Esirlikten azat etilgen ukrain vatandaşlarınıñ bir diger taqımı da Kıyıvğa keldi. Bu kere deñişmede 85 asker ve bir grajdan kişi azat etildi. Aralarında – on beş kadın. Hatırlatmağa istemiz ki, deñişme, Ukraina Prezidentiniñ emriniñ yerine ketirilmesi içün, Milliy Malümat Bürosınıñ (MMB faaliyeti çerçivesinde kerçekleşti.

Vitse baş nazir İrina Vereşçuknıñ emrine köre, azat etilgenlerni Reintegratsiya nazirliginde qarşılaştılar. İnsanlar evlerine qaytmadan evel yahşılaşmalılar ve tibbiy baqınuvdan keçmeliler.

Azat etilgenlerniñ bazılarınıñ hatıralarını yazdıq. Er kesni tek bir arzu birleştire: er kes eñ qısqa vaqıt içinde orduğa qaytmağa ve ana vatanını işğalcilerden qorçalamağa azır.

Borıs: «Qundaqnen ura ve rus televizionını seyir etmege mecbur ete ediler»

Borıs Platonov – Voznesenskten 79. adübnıñ tanklerge qarşıcısıdır. Onıñ ast bölügi Kulbakine avalimanını mıdafaa ete veKrasne qasabası yanında arbiy areketlerni keçire edi. Duşman uçaqları ve top bombardımanı tarafından yapılğan büyük ücümlerden soñ mücizeviy bir şekilde ayatta qaldı. Duşmannıñ avadaki üstünligi sebebinden askerler esirlikke oğradılar.

«Bizni farqlı yerlerde tuta ediler: çöllerde, çuqurlarda, garajlarda, – dep Borıs hatırlay. – Aş arasında – suv ve on kişi içün bir künde bir quru aş bar edi. Ya da bir qaç kün devamında iç bir şey olmadı. Bazıda birer çıqara ediler: qundaqnen ura, qulaq yanında ateş aça, qorquta ediler»,- dep o hatırlay.

Borıs digerlerinen Aqmescitteki arbiy qısımnda olğanında olarğa işğalciniñ tarafına ketmege tavsiye ettiler. Tek “ğalebeler” ve “zapt etilgen” Mıkolayivni yayınlağan rus televizionını seyir ettirtiler. Ukraina “endi yoq” dep.

«Amma rus propagandasınıñ ne olğanını bilem, bunıñ içün iç bir sözüne inanmay edim. Ve emin edim: bizler içün cenkeleşecekler. Böyle de oldı», – dep Borıs bahtını gizlemey.

Vladıslav: «Ruslar, esirlerge köpekni endirerek eglene ediler»

35. deñiz piyadesinden Vinnitsalı Vladıslav Kotsüba Zmiyinıy adasında hızmet ete edi.

«Birinciden mevamlarımıznı rus gemileri, bundan soñ da uçaqları ateşke tuta ediler, – dep o hatırlar. – Desant tüşürildi, quvetler teñ olmay ediler».

Esir etilgen ukrainalılarnı buksir vastasınen Aqyarğa ketirildi. Rus propagandasınıñ azaneviy adetlerinde mühbirler bir-birini ozmağa tırışıp, esirlerniñ evine ketirilmesini teşkil etken insaniy rus akimiyeti aqqında añlata ediler. “Aqyar qaraman şeeri” ve “Odesa qaraman şeeri” yazılarınen avtobuslar süslendi.

«Amma “evge” yerine birinciden bizni uçaqnen Kurskqa ketirdiler, – dep Vladıslav devam ete. – Bundan soñ avtozaklar vastasınen belli olmağan yönelişke ketirdiler. Biraz vaqıt -20 avada olğanda çadır şeerinde yaşay edik. Erkeklerniñ çoqusı el-ayaqlarını buzlattı. Amma en çoq Starıy Oskildeki 2. tahqiqat tevqifhanesini hatırlayım. Munasebetler – esirler cinayetçilernen kibi edi. Urbalarımıznı kiydirte ve çıqarta ediler, maneviyat ceetinden basa ediler, bağçada kezintiler vaqtında qaçağanımız köpekni endire ediler».

Cenk ve esirlikniñ zorluqlardan soñ erkekler bir ağızdan aytalar: insan ayatınıñ kerçek qıymeti – televizordaki parlaq resimler degil, öz devletiniñ qorçalanması ve yaqın kişilerniñ sevigi içün kerçek qayğırmadır.

Qoşma malümat:

Hatırlatamız, Milliy malümat bürosı (MMB), Ukraina Nazirler Kabinetiniñ qararını yerine ketirmek içün teşkil etildi ve onıñ vazifesi tüm mümkün olğan menbalarnı qullanaraq em ukrain, em de işğal ordusı tarafınıñ arbiy esirler, öldürilgenler, habersiz ğayıp olğanlar, hastalar ve yaralanğanlar aqqında malümat toplamaq ve umumiyleştirmektir.

Daa işğalciler tarafından qanunsız olaraq em de tınç yaşağan eali arasında tutulıp esir etilgenler.

Rus-ukrain cenki vaqtında alâqanı coyğanıñız aqrabalarıñıznı qıdırsañız – böyle vastalarınen MMBna muracaat etiñiz:

•  24 saat işlegen MMBnıñ “Sıcaq hattı”:1648 ve +38 (044) 287-81-65;
• [email protected] elektron poçtası;
• MMBnıñ saytı – nib.gov.ua, ğayip olğanlarğa dair malümat talabı içün mahsus forma vastasınen;
• Telegram – @nib_uncp_bot ;
• Facebook saifesinde.

MMBnıñ halqara-gumanitar uquqqa mücibi işlegenini qoşayıq. Bu cümleden: Arbiy esirlernen tutma aqqında (III) Cenevre şartnamesiniñ 122. maddesi ve Cenk vaqtında grajdanlarnıñ qorçalanması aqqında (IV) Cenevre şartnamesiniñ 136. maddesi.