Zaporijjâ vilâyetinde rus işğalcileri şiddetli tarzda ücüm etmege tırışalar, amma ukrain askerleri olarnıñ vilâyetiniñ içerisine ketmelerine izin bermeyler. Tecavuzcılar, tüm silâsını tek askerlerimizniñ mevamlarına degil, em de bir ateşli toplar silâsınen yete bilgen tınç meskün yerlerge de yöneteler.
Aprel ayınıñ 29-ından itibarınen
ZAPORİJJÂ VİLÂYETİ
Tünevin Orihiv şeerinde duşman ateşleri sebebinden altı mesken ev yana edi. Bundan bir kün evel ruslar Zaporijjâ “ava-topraq” sınıflı X-31 raketasınen ücüm ettiler. Şu anda şahsiy rayondaki bozulğan evler ve birisi bala olğan üç yaralanğan kişi aqqında bellidir.
Umumen vilâyetinde 572 bina ya tamamınen viran etildi ya da qısmen bozuldı. Rus tecavuzından berli ağlar ve donatmalar bozulğanı içün 70ten ziyade meskün yerde yigirmi bir biñ abune elektriksiz qaldı. Ateşler arasında “Zaporijjâoblenerho” ŞATniñ uzmanları bozmalarnı yoq etmege tırışalar. Böylece, keçken gece kommunalcılar, Orihiv elektrik ağınıñ toprağında, Vaslılivka ve Berdânskta energiya teminatını tamamınen yañıdan tiklemege becerdiler. Amma topraqlarnıñ bir qısmı alâ daa elektriksiz qalır.
Şu anda 85 şeer ve qasabada deyerli 66 biñ abune gazsız qala.Donetsk vilâyetiniñ toprağındaki magistral gaz borusınıñ bozulmaları sebebinden Berdânsk ve Melitopol rayonlarnıñ 48 meskğn yerinde gaz yoqtur.
Tünevin de gaz astyapısı zarar kördi: şiddetli arbiy areketler sebebinden alçaq üleştirici basım gaz boruları bozuldı ve gaz üleştirici noqtalarından biri qapatıldı. 380den ziyade abune gazsız qaldı. Bozulğan gaz teminatı, qazaiy yañıdan tikleme işleriniñ keçirilmesi içün irişim alınğan soñ acele ğayrıdan tiklenmege planlaştırılır.
Elektrik ve gaznı başqa bir şeynen deñiştirmek mümkün olsa, suvnıñ alternativası ise yoq. Yañartılğan malümatqa köre, şu anda Ğulay Pole şeerinde, Stepnoğirsk şşqda, Poloğı ve Vasılivka rayonınıñ yanındaki meskün yerlerinde suv teminatı yoq. Bundan ğayrı, artezian araçıqlarnı elektrik energiyasınen teminatınen bağlı meseleleri sebebinden Poloğı şeeriniñ bazı sakinleri suvsız qalır.
Arbiy areketler neticesinde Vasılivka rayonınıñ Vasılivka şeeriniñ ve Stepnoğirsk şşqnıñ stoklarını alğan kanalizatsiya temizleme inşaatları bozuldı.
Tüm mezkür meselelerge, patlamağan arbiy yedek sebebinden insanlarnıñ yaşamalarına muntazam telüke qoşuldı. Misal içün Veselânka köyünde kilse yanında minasızlaştırma gruppası BARS “Urağan”nı tapıp zararsız bir alğa ketirdi. Tavriyskede “Urağan”nıñ 11 snarâdı, çeşitli kalibli 9 topnı ve 2 kaseta raketini tapıp zararsız bir alğa ketirdi. Bunıñ içün vilâyetiniñ reberligi, halqnı pek diqqatlı, intizamlı ve halqqa açıq yerlerni ziyaret etme tüm tavsiyelerine riayet etmege çağıra.
Dercde, Zaporijjâ vilâyet devlet memuriyetiniñ resmiy Facebook saifesinden ve arbiy memuriyetniñ reberiniñ Telegram kanalından alınğan malümat qullanıldı.
