İşğalcilerniñ VİETda Ukraina vatandaşlarını böyle degen “referendumlar”ğa çekmege ıntıluvları, cinayettir. Bu, bizim devletimizniñ topraq bütünligi ve mustaqilligine iddiadır. Bu tür cinayetke ait olğan er kes içün Ukraina Cinaiy qanunnamesinde ciddiy bir ceza esapqa alındı, dep “RADA” teleşirketiniñ yayınında vitse baş nazir İrına Vereşçuk qayd etti.

Vitse baş nazir bildirdi: duşman “referendumları”nda iştirak etmege qaçınmaq içün Ukraina vatandaşları VİETdan çıqmalılar. Bu, olarnıñ yapa bilecegi eñ yahşı arekettir.

“Telükesiz bölgelerge köçmege imkânnı tapıñız – siziñ yaşamañız içün bütün şartlar yaratılacaq!” – dep memur çağırdı.

İrına Vereşçuk hatırlattı ki, keçken afta boyunca Herson vilâyetiniñ işğal etilgen topraqlarından Ukrainanıñ kontrol etkeni topraqqa tahminen 6 biñ vatandaş köçti – çoqusı balalarnen aileler.