Avropa parlamentiniñ mebusları, toprağında arbiy areketler bitecek soñ Ukrainanı NATOğa alma çağıruvınen rezolütsiyanı tasdıqladılar, dep Avropa parlamentiniñ saytında bildirildi.

 

Maqbul rezolütsiyağa 425 mebus rey berdi, 38 qarşı çıqtı ve 42 insan bitaraf oldı.

 

Avropa parlamentçileri bildirdiler ki, cenk bitecek soñ Ukrainanıñ NATOğa kiriş ceryanı eñ acele tarzda başlaycaqtır.

 

Ukraina tolu azalıqnı qazanmaycağına qadar NATO işdeşlikçilerinen beraber AB Kıyivnen cenkten soñ kerçekleştirilecek vaqtınca telükesizlik mehanizmi azırlamalılar.

 

Bundan ğayrı, Avropa eyyeti Ukrainanıñ yedi namzet tevsiyesini yapmasına dair pozitif netice berecek ve tamam bu sene Ukrainanıñ ABe kişiri aqqında aytışmalar başlaycaq, dep vesiqada ümüt bildirildi.

 

Rezolütsiyada rusiyeniñ Kahovka suv bentini yoq etmesi de takbih etildi. Qayd etildi ki, bu akt, Ukrainada suv basular, ekologik felâket ve ekologik genotsidniñ sebebi olğan cenk cinayetidir. Halqara uquqqa mücibi, bu cinayetke ait olğan er kes mesüliyet alacaqtır.

 

Aynı zamanda parlament ABni Ukrainanıñ yañıdan qurulmasına yönelişecek tedbirler paketini kirsetmege çağırdı.Yañıdan quruv ceryanı ülkeniñ acelen, orta ve uzun müddetli ihtiyaclarını esapqa alınmalı.

 

Mebuslar tüşüneler ki, yañıdan quruv ceryanını Ukrainanıñ ABe kirişine azırlanmasınen ve onıñ içeri islâatınen beraber keçirmek kerek.