Ukraina milliy bankı banklarğa ve bank olmağan para deñiştirici noqtalarğa müştericilerden eski ya da çoq qullanılğan ecnebiy banknotlarnı almamağa yasaq etti, dep idareciniñ matbuat hızmeti haber berdi.

Bugünden pek çoq qullanılğan ya da bozulğan banknotlardan ğayrı, mahsus saylayıcı alet tarafından kerçekligi tasdıqlanğan ecnebiy banknotlarnen para-deñiştiricioperatsiyalar istisnasız yapılmalılar. 

Bundan ğayrı, para-deñiştirici operatsiya yapqanda banklar ve bank olmağan müessiselerge, ecnebiy banknotlarnıñ nominalı ve emissiya senesine dair sıñırlamalarnı kirsetmege yasaqlandı.

Aynı zamanda pek çoq qullanılğan (misal olaraq, parçalanğan, boyalanğan, yanğan ve ilâhre) banknotlarnen inkaso operatsiyaları yapılmalılar. Bu tür operatsiyalarnı yapqan banklar ve bank olmağan müessiseler, müştericiler içün irişilir bir yerde çoq qullanılğan banknotlarnıñ alâmetleri cedveli ve inkasonıñ fiyatını kassada asmalılar.

UMB qayd etti ki, bank ya da bank olmağan maliyeviy müessise mezkür qaidelerni bozsa, olarnıñ areketleri dolandırıcı faaliyet olaraq tanına bilir.

Bank ya da bank olmağan maliyeviy müessise müştericiniñ aqlarını bozsa, bu banknıñ ya da bank olmağan maliyeviy müessiseniñ reberligine şikâyetnen hitap etmek kerek. Eger bu tür müessiseniñ reberligi kerekli areketlerni yapmasa, müşterici Milliy bankqa şikâyet yollaya bilir.