Cenkniñ başlanğıcından Ukraina içün halqara ortaqlar deyerli 170 mlrd yevro ayırdılar.  Bu miqdar, ecnebiy ülkelerniñ ükümetleri ve halqara maliyeviy teşkiltlardan arbiy, maliyeviy ve gumanitar yardımdan ibarettir. Kilsk dünya iqtisadiyat institutınıñ yañartılğan araştırmasında mezkür malümat bildirildi.

Ukraine Support Tracker sistemasınıñ bilgilerine köre 40 ülke, avropa müessisesi, Halqara para fondu ve Dünya bankı, Ukrainanıñ donorı oldı.

Avropa Birligi deyerli 62 mlrd yevro ayırdı, AQŞdan yardımnıñ miqdarı 71 mlrd yervo oldı. Donor olğan ülkeler cedveline Büyük Britaniya, Kanada, Avstraliya, Yañı Zelandiya, Çin, Yaponiya, Norvegiya, Cenübiy Koreya, İsviçre, Tayvan, Türkiye ve İndistan qatıldılar. Olardan Ukraina 23 mlrd yevrolıq halqara yardım aldı. Daa halqara maliyeviy müessiseler deyerli 13 mlrd yevro berdiler.

Ayırılğan paranıñ yarısı, maliyeviy yardımdır. Daa tahminen 40%-i – arbiy yardım ve qalğanı – gumanitar yardımdır.

Amerika Qoşma Ştatlarından Ukraina eñ çoq arbiy destek aldı. Amerika ortaqlarından arbiy yardımnıñ miqdarı 43ten ziyade mlrd yevrodır.

Avropa Birligi, maliyeviy yardım yönelişinde lider oldı. ABniñ azası olğan ülkeler ve avropa müessiseleri Ukrainanıñ bücet ihtiyaclarına deyerli 36 mlrd yevro bermege söz berdiler.