Birleşken Milletler Teşkilâtınıñ eñ az 50 ülkesi, Ukrainanıñ vaqtınca işğal etilgen topraqlarında rusiyeniñ sahte saylavlarnı keçirmege ıntıluvlarını takbih etici orta arizağa qatıldı.

BMTndaki Ukraina daimiy temsili bu aqqında haber berdi.

“Biz, halqara şekilde tanınğan Ukrainanıñ topraqlarında rusiyeniñ prezident saylavlarını teşkil etmege qanunsız ıntıluvlarını qararlı şekilde takbih etemiz. Ruhset almadan BMTnıñ azası olğan diger devletniñ topraqlarında saylavlarnı keçirmek – suverenitet ve topraq bütünligi printsiplerini körmemezlikke urmaq demektir. Halqara uquqqa binaen böyle saylavlarnıñ uquqiy küçü yoq”, – dep arizada bildirildi.

Arnavutlıq, Andorra, Argentina, Avstraliya, Avstriya, Belçika, Bosna ve Hersek, Bulğaristan, Kanada, Çili, Kosta-Rika, Hırvatistan, Qıbrız, Çehiya, Danimarka, Estoniya, Finlândiya, Frenkistan, Gürcistan, Almaniya, Yunanistan, Macaristan, İslandiya, İrlandiya, İsrail, İtaliya, Yaponiya, Latviya, Liberiya, Lihtenşteyn, Litvaniya, Lüksemburg, Malta, Marşall adalar, Monako, Montenegro, Felemenk, Yañı Zelandiya, Şimaliy Makedoniya, Norvegiya, Palau, Paragvay, Lehistan, Portugaliya, Cenübiy Koreya, Moldova, Romaniya, San-Marino, Slovakiya, Sloveniya, İspaniya, İsveçiya, İsviçre, Büyük Britaniya, AQŞ, Urugvay ve Avropa Birligi arizanı destek ettiler.

Bundan ğayrı, BMTnıñ azası olğan ülkeler, 2022 senesi orta küz ayınıñ 12-sinde mahsus sessiyada tasdıqlanğan Baş Assambleyanıñ rezolütsiyasını hatırlattılar. O, halqara uquqqa binaen 2022 senesi berim ayında rusiyeniñ Ukrainanıñ Donetsk, Herson, Luhansk ve Zaporijjâ vilâyetleriniñ ayrı rayonlarındaki qanunsız “referendumları”nıñ aqqını tanımadı.