Bugün Nazirler Kabinetiniñ oturışında “Mobilizatsiya etilgenler, arbiy hızmetlerde ve rezervlerde bulunğanlar aqqında malümatnıñ avtomatik verifikatsiyası ve teşkerüvi boyunca deñev leyhasınıñ ömürge keçirilmesi aqqında” qararı qabul etildi.
O, bir qaç müim hususiyetni közde tuta:
- Çağırılğanlar içün arbiy cedvel
17 yaşından 25 yaşına qadar erkekler arbiy-tibbiy eyyetinden keçmeyip, arbiy cedvelge alınalar. Bu, em Ukraina içinde yaşağan, em de çetelde yaşağanlarğa aittir.
- Vesiqalarnıñ çetelde teşkerüvi
Bu, çetelde bulunıp, Ukraina ya da çetel pasportlarını almaq içün muracaat etken 18 yaşından 60 yaşına qadar erkeklerge ait. Olar öz arbiy esap vesiqalarınıñ aqiqiyligini devletniñ “Trembita” elektron sisteması vastasınen teşkerecekler.
- Sicilge kirsetüv
Ukrainada yaşağan ve pasport almaq içün muracaat etken 16-25 yaşındaki erkekler, Askerlikke çağırılğanlar, arbiy mecburiyetler ve yedeklerniñ yekâne devlet siciline (YDRPVR) VLK (arbiy-tibbiy eyyeti) keçmeden kirsetilecek.
Bu, çetelde bulunıp, çetel Ukraina temsilciliklerinde pasportnı resmiyleştirmek ya da almaq içün muracaat etkenlerge de ait.
- Vatandaşlarnıñ cedveli
16 yaşından 60 yaşına qadar Ukraina erkek vatandaşlarınıñ cedveli tizilecek, olarnıñ bilgileri YDRPVRge kirsetilmek kerek ve olar arbiy cedvelge alınacaqlar.
Qararnıñ leyhasını ReNazirligi, Mudafaa nazirligi, Devlet migratsiya hızmeti, İçki işler nazirligi ve Ukraina Silâlı quvetlerniñ Baş ştabınen birlikte azırlandı. Onıñ kerekliligi, vitse nazir İrına Vereşçuknıñ yolbaşçılığı altında keçirilgen müessiselerarası oturışta çoq kere muzakere etildi.
Bu kibi yañılıqlar arbiy hızmetke çağırılğanlar, arbiy hızmette bulunğanlar ve yedekçilerniñ yekâne devlet cedvelinde malümatnıñ optimizatsiyasını ve identifikatsiyasını temin etmege yardım etecek.