Kıyıv vilâyeti, işğalcilerden pek şiddetli tarzda zarar körgen bir bölgedir. Küçlerini nasıl yañıdan pekite?
Borodânka, rus istilâsından eñ çoq zarar körgen paytahtnıñ civarlarından biridir. Yavaş yavaş yaralarını devalay, insanlar ise kelecek içün planlarını quralar. Yaqın kelecekte mında meskenini coyğan sakinler içün vaqtınca modul şeerçigi açılacaq.
Umumen 4 kompleks olacaq, olar yaşama içün 22 moduldan, aşhaneden, duştan, keneften ve diger kerekli tehnikiy ve turmuş odalarından ibaret olacaq. Mesken parçasınıñ büyükligi, 6 ✕ 2,5 mertdir. Şu anda olar qurula ve ertaftaki topraq donatıla.
Leh ükümtinden yardım olaraq ketirilgen mesken bünyeler, yerli stadionnıñ toprağında yerleştirilecek. Yañı evlerni satın alma ya da qurma meselesi çezilgen vaqıt içün uyğun bir variant olacaq.
Şu anda işğalcilerden zarar körgen diger meskün yerlerde de böyle leyhalarnıñ yerine ketirilmesi de baqıla.
İrpinde ise yañı mesken kompleksniñ qurulması planlanır. Şeerde 4 ve 5 qatlı yañı evler peyda olacaq. Dairelerniñ tahminiy sayısı, 900-1000. Leyha teklifleri endi şekillendirildi, baş plannıñ quruv sheması azırlana. Meskenge adiy talaplardan ğayrı, sıñırsızlıq, energiya saqlanması, sığınaqlarnıñ bar olması olacaq.
Kıyıv vilâyetiniñ diger şeerçikleri de tam qıymetli ayatqa yavaş yavaş qaytalar. Tünevin FVDHniñ patlama tehnikacıları bölgeniñ deyerli yigirmi meskün yerini teşkerdiler. Çalışmalar vaqtında deyerli beş yüz patlayıcı şey zararsız bir alğa ketirdiler. Umumen tüm minasızlaştırma vaqtı içinde 32,6 biñ patlayıcı şey tapıldı. Bunıñ içün şimdi sakinler, telükesiz topraqqa qayta ve qaza-tamir taqımları da kete bilirler.
Tünevin kommunalcıları, Kıyıv vilâyetiniñ altı (Ğostomel, Horentsi, İrpin, Buça, Teterivske ve Kuhari) meskün yerindeki deyerli 500 qoranta içün elektrik teminatını temir ettiler. Şu anda Buça ve Vışhorod ryonlarınıñ diger meskün yerlerinde çalışmalar devam ete. Bu cümleden, öz evlerine qaytqan qullanıcılarnıñ arizalarına mücibi.
“Kıyıvoblhaz”nıñ mütehassısları, gaz teminatı işlerini deyerli tamamınen bitirdiler. İrpin şeeri (18% qullanıcısı) qısmen gazsız qalır.
Daa vilâyetiniñ tüm meskün yerlerinde suv peyda oldı ve suv üleştirici işley. Ğostomilniñ elektriksiz bazı evlerinden ğayrı. Şu anda mütehassıslar ayrı evlerni elektrikke bağalaylar.
Diqqat! Ukrainanıñ vaqtınca işğal etilgen topraqlarınıñ reintegratsiya meseleleri nazirligi ve FVDHniñ mütehassısları tenbiyeleyler:
- yerli akimiyet organlarınıñ ve Ukraina fevqulâde vaziyetler devlet hızmetiniñ izin almadan işağlden azat etilgen topraqlarda bulunmaq pek telükeli;
- devlet organlarınıñ da yerli akimiyetniñ resmiy izininden soñ eviñizge, işğalden azat etilden rayonlarğa qaytıñız;
- qaranlıq yerlerde qalmañız ve körmeyip iç bir şey açmañız;
- yalñızca teşkerilgen ve sert yüzlü yollarda ketiñiz. Ormalar ve çöllerde yürmeñiz;
- patlayıcı şeyni tapqanda – telükesiz bir mesafege ketiñiz ve 101 ya da 102 noremağa telefon etip mütehassıslarnı bildiriñiz.
Foto: kosatka.media