Bu mesele, cenkiy vaziyet şaraitinde bala aqlarınıñ qoruvı idare ştabınıñ oturışında baqıldı. Tünevin o, Prezident Ofisiniñ Yolbaşçısınıñ muavini İrına Vereşçuknıñ yolbaşçılığında keçti.

Vilâyetlerniñ temsilcileri aile türlü bala evleri (ATBE) içün mesken qıdıruvı ve satın aluvı aqqında haber ettiler. Al-azırda bölgelerde uyğun ev qıdıruvı devam ete.

Bundan da ğayrı, oturışnıñ iştirakçileri maliye meselelerini muzakere ettiler. Şu cümleden, qoşma parağa muhtac olğan vilâyetlerge paralarnı ayırmaq imkânını añlattılar.

Hatırlatamız ki, 2024 senesi berim ayınıñ 13-nde qabul etilgen Nazirler Kabinetiniñ 1055. qararı amelge keçirile. O, devlet bücetinden yerli bücetlerge aile türlü bala evleri içün mesken satın aluvına imtiyazlarnıñ ayırılmasını közde tuta.

Umumen bu yılnıñ soñuna qadar 94 ATBE içün mesken satın alınacaq.