58-inci arbiy esirler deñişiminde evge “Azov” askeri ve Mariupol mudafaacılarından biri, 28 yaşındaki Vladıslav Andrianov qayttı. O, daa evel esir alınğan ve bu sene mayıs ayında azat etilgen Mariupol polisiniñ hadimi Maryana Çeçelükniñ sevgilisidir.

Vladıslav Rusiye tarafından Olenivtsi şeerinde yapılğan terraktnı başından keçirdi, keçken sene ise işğalciler onı qanunsız olaraq müstemlekede 25 yılğa “üküm ettiler”. Orta küz ayınıñ 18-nde, esirlerni deñiştirüv neticesinde, Vladıslav daa 94 qorçalayıcımıznen beraber Ukrainağa qayttı.

Sevgilisiniñ qaytmasını Maryana Çeçelük bekley edi. Tolu miqyası istilâ başlağan vaqıt o, Mariupol şeeriniñ Milliy polisiniñ bölüklerinde buluna edi. Maryana ve onıñ qız qardaşı ateşten qorçalanıp, “Azovstal”da gizlene ediler, mayısnıñ 1-de ise şeerni “yeşil koridor”nen terk etmege tırışa ediler.

Çıqmağa tırışqanda, qıznı işğalciler tutıp aldılar, Donetsk SİZOsında, Olenivka müstemlekesinde, soñra ise Taganrogda tuta ediler.

Ukrainağa 2024 senesi mayısnıñ 31-nde deñişim çerçivesinde qayttı.