Prezident ofisiniñ yolbaşçısınıñ muavini İrına Vereşçuknıñ yolbaşçılığında “Ukrainanıñ şarqında devlet içinde köçip kelgen şahıslarnıñ mesken şaraitini eyileştirüv” halqara tehnikiy yardım leyhasınıñ amelge keçirilmesiniñ şimdiki vaziyetine bağışlanğan oturış olıp keçti.

Oturışta ReNazirligi, Ukrainadaki Halqara migratsiya teşkilâtı (HMT), Qurucılıq içün kredit müessisesi (KfW), vilâyet arbiy memuriyetleri ve yerli idare organlarınıñ vekilleri iştirak ettiler.

Bu leyha, arbiy areketler neticesinde viran etilgen evlerniñ ğayrıdan tiklenilmesini ve zemaneviyleştirilmesini, em de Kıyiv, Vinnıtsâ, İvano-Frankivsk, Lviv ve Çernivtsi vilâyetlerinde yañı mesken obyektleriniñ qurulmasını közde tuta.

Oturışnıñ iştirakçileri leyha obyektlerinde işlerniñ kerçekleştirüv müddetini belgilediler ve al etilmeli olğan meselelerniñ çezilüv yollarını muzakere ettiler.

İrına Vereşçuk, leyhanıñ keyfiyetli ve eñ yaqın vaqıtta amelge keçirilmesi içün, devlet akimiyeti ve teşkilâtlarınıñ idaresini quvetleştirmek kerekligini qayd etti.

Qayd etmek kerek ki, “Ukrainanıñ şarqında devlet içinde köçip kelgen şahıslarnıñ mesken şaraitiniñ eyileştirüvi” halqara tehnikiy yardım leyhası Almaniya ükümetiniñ maliyeviy destegi ve ReNazirligi yardımınen HMT vastasınen ömürge keçirile.