Orta küz ayınıñ 25-nde Ukrainada “Dayanıqlıq Kündeligi” mahsus leyhası başlandı. Onıñ teşkilâtçıları ukrainlilerni özleriniñ ğayrıdan tiklenüvine ve motivatsiyasına yardım etken şeyler aqqında aytmağa davet eteler.

“Dayanıqlıq kündeligi” – “Suspilne Yayını” ve “Ukraina radiosı”nen işbirlikte birinci hanım Zelenska tarafından teşebbüs etilgen Bütünukrain ruhiy sağlıq programmasınıñ kommunikatsiya kampaniyasınıñ bir qısmıdır.

İstegen er kes, leyha platformasında ikâyesini derc etip, ruhiy sağlığını saqlav tecribesinen paylaşa bile. Bu ikâyelerniñ maqsadı – yardımğa muhtac olğanlarğa yardım etmek, başqalarını ilhamlandırmaq ve müsbet bir motivatsiya bermektir.

Leyhağa qoşulmaq içün, öz ikâyeniñizni Bütünukrain ruhiy sağlıq programmasınıñ platformasında olğan mahsus saifege yüklemek yeterlidir. Anda bir ay devamında pek çoq ikâye olacaq.

Leyha aqqında malümatnı içtimaiy ağlarda da tarqatmaq mümkün, böylece insanlar bu onlayn arhiv aqqında ögrene ve duyğularını ve tecribesini paylaşa bileler.