2024 senesi orta küz ayınıñ 31-nde Ukrainada halqara gumanitar uquq normalarınıñ qullanıluvı ve amelge keçirilüvi meseleleri idarelerara eyyeti, Büyük Britaniya ve Şimaliy İrlandiya Birleşken Qırallığınıñ halqara gumanitar uquq milliy eyyeti, institutlar arasında işbirlikniñ keñişletilmesini közde tutqan añlaşma memorandumını tizdiler.

Vesiqanı Ukrainanıñ vaqtınca işğal etilgen topraqlarınıñ reintegratsiya meseleleri naziriniñ vazifelerini vaqtınca eda etken Anatoliy Stelmah ve Büyük Britaniya ve Şimaliy İrlandiya HGUnıñ Milliy eyyetiniñ reisi Endrü Merdok 34-ünci Qızıl Haç ve Qızıl Ay Halqara konferentsiyası çerçivesinde imzaladılar.

Memorandum Ukraina ve Büyük Britaniyanıñ halqara gumanitar uquq saasında halqara uquq mecburiyetleriniñ yerine ketirilmesini temin etmek içün işbirlik ve tedbirlerniñ koordinatsiyasını quvetleştirmege, tecribeniñ, bilginiñ ve eñ yahşı ameliyatnıñ paylaşılmasını közde tuta.

“Ukraina cenk şaraitinde HGUqa uyğun yüksek standartnı kösterdi. Britaniya halqara uquq mektebi dünyada eñ yahşı ve eñ tanınğanlardan biridir. Bizim içün tek muvafaqiyetlerge qol tutmaq degil de, qazanğan tecribemizni paylaşmaq da müimdir”, – dep qayd etti Anatoliy Stelmah.

Bundan da ğayrı o, Büyük Britaniya ükümetine Rusiye Federatsiyasınıñ Ukrainağa istilâsı başlağan soñ Ukrainağa köstergen destek içün minnetdarlığını bildirdi.

Ukrainanıñ halqara gumanitar uquq saasında medeniy dünya memleketlerinen işbirliginiñ quvetleştirilmesi pek müimdir, çünki Rusiye Federatsiyasınıñ tolu miqyaslı istilâsı ve istilâcınıñ halqara uquqqa sayğısızlığı sebebinden HGU dayanıqlıq sınavından keçe. Ukrainanıñ reberligi ve onıñ tecribesi sayesinde halqara uquq qoruyıcı teşkilâtlarınıñ kelecegi şekillenecek – cenk qurbanlarını, hususan vatandaşlarnı ve olarnıñ eñ zayıf gruppalarını qorçalamaq içün yañı adalet mehanizmleri şekillenecek.