İşğalciler, Lugansk vilâyetine soñuna qadar “basmağa” tırışalar. O yerge biñlerce tehnikanı ve asker ketirirler, aviatsiyanı kütleviy olaraq qullanırlar. Severodonetsk ve onıñ etrafındaki köyler, duşman ateşlerinden eñ çoq zarar körir. Tecavuzcılarnıñ çoq vaqıt devamında “ayat yolu”nı kesmege tırışqanları ğirske ve Popasna cemaatlarında çoq ateş bar.

Mayıs ayınıñ 19-ından itibarınen

LUGANSK VİLÂYETİ

Severodonetskte rus ordusı, “Azot” himiyaviy zavodını yañıdan ateşke tuttı. Memuriy binalardan biri ve keçiti bozuldı. Şeer çoq profilli hastahane toplarnıñ ateşine oğradı – onıñ daa eki koprusı bozuldı. İşlenmeleri tüm dünyada belli olğan “İmpuls”Severodonetsk ilmiy-istisal birleşmesiniñ binasına ateşler qayd etildi.

Bundan ğayrı, şeeriniñ farqlı rayonlarında patlamalar sebebinden 12 mesken ev zarar kördi. Dairelerde ve ticaret çadırlarında yanğın başladı. Vrubivka, Nırkove, Komışuvaha, Katerıvika ve Orihove meskün yerlerinde evlerniñ ve diger grajdan obyektlerniñ çoq viraneligi qayd etildi.

Keçenlerde Lısıçanskta ruslar, quvetli elektrik stantsiyasını elektrikten kestiler. Vilâyeti tammaınen ışıqsız qaldı. O, er bir yerde, mücize olaraq qalğanı evlerde bile yoq oldı. Umumen 42 meskün yer elektrikten kesildi. Bu, 117,5 biñden ziyade qullanıcı. 818 transformator ast stantsiyası da södürildi.

Merkezleştirilgen suv teminatınen vaziyet beñzegendir. O, tüm vilâyetinde mevcut olmay. Er kün qurtarıcılar onı evlerge ve sığınaqlarğa ketirirler. Misal içün, tünevin 32 tonna suv ketirdiler. Şu anda vilâyetiniñ işğal etilmegen toprağında 50 biñge qadar sakin qalğanını esapqa alıp er bir sakin içün bir künde yarım litrden az suv olğanını saylamağa zor olmay.

Gaz vaziyeti biraz yahşıca: gaz borusı mücize olaraq bozulmağan ya da temir etilgen üç meskün yerniñ 36 biñ abunesi onen temin etilir. Vilâyetiniñ sakinleriniñ çoqusı aş ateş üzerinde pişirir.

Vaziyet izin bergende tahliye yavaş yavaş devam eter. Keçenlerde o yañıdan başlatıldı. O qadar çoq insan ketmey – bir qaç kişiden bir qaç on kişige qadar. Misal içün, keçken künlerde Severodonetsk ve Lısıçansktan 30 yetişken ve 6 bala tahliye etildi. Avtobus, “Gradlar”ğa oğradı. Bahtına, er kes sağlı ve endi telükesiz bir yerdedir. Er kün daa çekilmez alğa kelgen ve daa çoq insannıñ çıqmağa istegeni Ğirske ve Vrubivka cemaatlarınıñ sakinleri de qurtulır. İmkân olsa, insanlarğa gumanitar yükler ketirilir.

Rusiye tarafından işğal etilgen bazı cemaatlarnıñ yerli akimiyetleri de tahliye etti. Olar tecavuzcılarnen işdeşligini yapmağa vazgeçip, çıqtılar ve bücetçilerge para berilmesini ve insalarnı desteknen temin etmek içün Ukrainanıñ başqa şeerlerinde yañıdan qayd ettiler.

Misallerden biri Kreminnadır. Orası yerli akimiyeti tasil, medeniyet, gençlik ve sport idaresiniñ faaliyetini başlattı. Üç yüzden ziyade işçi telükesiz bölgelerge ketip uzaqtan rejiminde işni teşkil ettiler. Bunıñ içün medeniyet müessiseleriniñ ve bala bağçalarınıñ paranen temin etilmesi yavaş yavaş yañıdan başlana. Ve böyle misaller çoq.

Aynı zamanda Lugansk vilâyetiniñ işğal etilgen toprağında rus işğal ordusına zornen mobilizatsiya etilgen kişilerniñ aile azaları tarafından kütleviy narazılıq numayışları keçirilir. Soñki Lugansk ve Rovenkı şeerlerinde keçirildi. Narazılıq yapqanlarnıñ esas talabı, mobilizatsiya etilgenlerni evine qaytarmaqtır.

Dercde, Lugansk vilâyet devlet memuriyetiniñ resmiy Facebook saifesinden ve Lugansk arbiy memuriyetiniñ reberiniñ resmiy Telegram kanalından alınğan malümat qullanıldı. Vilâyetiniñ toprağında arbiy areketler devam etkeni sebebinden vilâyetiniñ vaziyetini ögrenmek şu anda imkânsız qalır.