Bugün esirlerniñ daa bir deñişmesi keçirildi. Evine Ukrainanı 50 mudafaacı qaytarıldı. Olar aralarında Azovstalnıñ qorçalayıcıları, milliy gvardiyacılar, deñiz askerleri ve Zmiyinıy adasından sıñırcılar.

Şu cümleden, Ukraina milliy gvardiyasınıñ 20 askeri, Arbiy-deñiz quvetleriniñ 12 askeri, Ukraina Silâlı Quvetleriniñ 10 askeri, Devlet sıñır hızmetiniñ 6 askeri ve Topraq mudafaasınıñ 2 askeri muvafaqiyetnen qaytarıldı. Azat etilgenler aralarından eñ qart olğan kişiniñ 44 yaşı ve eñ gençniñ 19 yaşı bar.

Deñişme Prezident Ofisi, İstihbarat Baş İdaresi, Ukraina Mudafaa Nazirligi ve Ukraina Telükesizlik Hızmetiniñ ve başqa quvet müessiseleriniñ yardımınen keçirildi.

Reintegratsiya nazirliginiñ Milliy malümat bürosı, azat etilgen mudafaacılarnıñ içtimaiy qorçalanmasını ve ilk yardımnı temin ete: yaqınlarınen telefon alâqası, ilk kerekli eşyalar, şahsiy vesiqalar ve benk kartlarını yañıdan vesiqalaştıruv, tibbiy yardım, uquqiy yardım v.b.

Hatırlatamız ki, tünevin deñişme çerçivesinde esirlikten evge 35 asker ve grajdan kişi qaytarıldı.