2021 s. dekabr ayınıñ 28-inde Vitse-baş nazir – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuk Qırımdaki siyasiy esirlerniñ qorantalarınen şahsiy körüşüvni keçirdi.

İrina Vereşçuknıñ sözlerine köre, şimdi bu mesele Reintegratsiya nazirliginiñ işinde eñ prioritetlilerden biridir.

Böylece, körüşüv vaqtında «Kremlniñ esirleriniñ» qorantaları ve aqrabaları, qanunsız olaraq azatlıqtan marum etilgen vatandaşlar ve qorantalarınıñ er vaqıt rastkelgeni ayatiy ve aktual meselelernen bağlı öz tüşüncelerini ifade ettiler.

Körüşüvde daa Ukrainanıñ qanunlarına ola bilgen deñişmeler kirsetüv, bu cümleden azatlıqtan marum etilgen kişiler ve qorantalarınıñ içtimaiy ve uquqiy statusı aqqında №6104 qanun leyhasını qabul etüv muzakere etildi. İrina Vereşçuk, şimdi akimiyet ve ukrainlerniñ esirler ve qorantaları aqqında hatırlamağa ve olarğa yardım etmege kerekligini qayd etti.

«Siyasiy esirlerniñ aqrabalarınıñ közlerini körgende olarda büyük metanet ve mustaqillikni duydım. Bu insanlar, akimiyet ve ukrainlerniñ esirleri ve qorantaları aqqında unutmamasını isteyler. Bu yürekten yürekke bağ, evine yolunda tutqan eñ müim şeydir», – dep İrina Vereşçuk hulâsa çıqardı.