«Stanıtsâ Luganska» kiriş-çıqış yoqlav keçitiniñ hızmet zonasınıñ toprağında tibbiy hadimlerini yerleştirmek ve COVID-19ğa qarşı aşı noqtasını abadanlaştırmaq içün modul bünyesi tiklendi. Tiklevni, Ukrainanıñ vaqtınca işğal etilgen topraqlarınıñ reintegratsiya meseleleri nazirliginiñ idare saasına kirgen «Reintegratsiya ve ğayrıdan tikleme» devlet teşkilâtı yaptı.

Yañı noqtanıñ maqsadı, vaqtınca işğal etilgen topraqrlarda yaşağan Ukrain vatandaşı içün COVID-19ğa qarşı vaktsinatsiyağa irişimni qolaylaştırmaqtır.

Bugünden sıñır sızığından keçken vatandaşlar modul noqtasında vaktsinatsiya hzımetini ala bilecekler. İş grafigi – er kün saat 8:00den 15:00ke qadardır.

Şimdi vatandaşlar içün AstraZeneca, Pfizer-BioNTechten Comirnaty ve Sinovac Biotechten CoronaVac kibi üç vaktsina bar. Yaqın zamanda Moderna (mRNA-1273, Spikevax) vaktsinası da olacaq.

Şimdi «Stanıtsâ Luganska» KÇYKniñ, sıñır sızığında bulunğan ve er kün çalışqan tek yoqlav keçiti olğanını hatırlatamız. Başqa KÇYKleriniñ tamamiy işini işğal memuriyetleri bloklamaqta. Yanvar ayınıñ 10-undan 16-sına qadar «Stanıtsâ Luganska» KÇYKnden eki tarafqa sıñır sızığını 11 331 vatandaş keçti. 48 kişi ise vaktsinatsiya hızmetini aldı.

Evelleri Ukraina Nazirler Kabineti, Vitse-baş nazir – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuknıñ teşebbüsinen KÇYKnden keçüv usulını qolaylaştırdı. Bugünden sıñır ya da memuriy sızığından keçkende Vdoma elektron hızmetiniñ mobil qullanımını qurmağa ve COVID-19nen bağlı özüni izolâtsiya etmege kerekligi lâğu etildi. KÇYKnden keçkende test yapmaq ta kerekmey.