Umumiy ukrain telemarafonı vaqtında Freeдом: UA kanalında Ukraina Vitse baş naziri İrina Vereşçuk, halqara uquq teşkilâtlarınıñ vekillerini ukrain reineleriniñ azat etilmesine qatılmağa çağırdı.

«Şu anda Ukrainada tahminen 600 rus reinesi bulunmaqta, – dep memur hatırlattı. – Olarnı reineleriznen deñiştirmek içün toqtamayaraq aytışmalar keçiremiz. Cedvellerni tertip etemiz, Halqara Qırmızı Haç Eyyetini ceryanğa çekemiz. Amma ayrı bir mesele de bar. ruslarnıñ esirliginde tek askerler degil, şeerlerniñ merleri, jurnalistler, göñülliler, papazlar, silâ asla tutmağa adiy işçiler kibi çoq grajdan ukrainalı da bulunmaqta».

İrina Vereşçuknıñ añlatqanı kibi, olarnı deñiştirecek kimsemiz yoq. Çünki rusiye böyle bir şart qoya: askerler – askerlerge, grajdanlar – grajdanlarğa.

“Rus tarafınıñ aytışmacılarını er vaqıt sorayım: deñişme fondu olaraq köstermek içün tüm dünyadaki ruslarnı esir etmelimizmi? Amma biz ne terorcılarımız, ne de kosanlarımızdır, bunıñ içün böylece areket etmeycekmiz,” – dep memur añlata.

“Rusiye, halqara gumanitar uquqnıñ qaidelerini tasdıqladı, şimdi ise ona riayet etmey. Cenevre şartnamesinde grajdanlarnıñ askerlerge deñişmesi yasaqlandı. Bunıñ içün halqara cemaatqa ve uquq qorçalayıcı teşkilâtlarğa ukrain grajdan kişileriniñ işğalcilerden azat etilmesini talap eterek muracaat etem! Bu vaziyetten qurtulmanıñ tek yolu budır,” – dep Vitse baş nazir hulâsa çıqardı.