Ukraina Prezidentiniñ ofisindeki netice brifingi vaqtında Ukraina Vitse baş naziri İrina Vereşçuk bunı haberdar etti.

Mariupol ve Berdânsktan Zaporijjağa gumanitar koridorlar vastasınen öz naqliyatınen ve tahliye avtobuslarınen 3 256 kişi tahliye etildi.

1 205-i ise Mariupoldan.

2050 kişi Poloğı, Vasılivka, Berdânsk ve Melitopol kibi Zaporijjâ vilâyetiniñ şeerlerinden çıqtı.

Bugün Melitopolğa 9 tahliye avtobusından ibaret olğan sutun kelecek. Avtobuslar vastasınen gumanitar yardım da ketirilecek.

Yarın saba avtobuslarnıñ Zaporijjâ yönelişine yollanması planlanır. Toplama yeri – İvan Alekseyev sq., 12 (10. yanğın qısmı).

Daa bugün 2 tahliye avtobusı Tokmak şeerine keldi. Bu naqliyatnıñ çıqması yarın saba planlanır.

Toplama yeri – Şevçenko sq., 5.

Bundan ğayrı, insanlarnı Berdânsktan tahliye etmek içün avtobuslar saba Zaporijjâ şeerinden yollanacaq.

Lugansk vilâyetindeki Lısıçansk, Severodonetsk, Rubijne ve Kreminna şeerlerinden bugün 1420 kişi tahliye etildi.

“Yarın Mariupol ve Zaporijjâ vilâyetiniñ bloklanğan şeerleri içün gumanitar koridor açmaq ve insanlarnı Lugansk vilâyetiniñ şeerlerinden tahliye etmek içün çalışmağa devam etecekmiz, – dep İrina Vereşçuk qayd etti. – Özüñizni ve ana vatanı Ukrainanı saqınıñız! Çünki o bizde tek bar!”.