Telükesizlik sebebinen bugün gumanitar koridorlarnıñ açılmamasına qarar berildi, dep Vitse baş nazir İrına Vereşçuk haberdar etti.

«Mariupol, Berdânsk, Tokmak ve Enerğodardan koridorlar aqqında uzun ve zor aytışmalarımız bar edi. Daa Herson vilâyetinden (Novovorontsovka, Osokirivka, Mırolübivka, Novovoznsenske, Vısokopillâ) koridorlar üzerinde çalışa edik. Elbette, Lugansk vilâyetinin Severodonetsk, Lısıçansk, Rubijne, Popasna şeerlerinden ve Nıjnye qasabasından koridorlar aqqında da añlaşmağa tırışa edik, – o dep añlattı. – Faqat, rus işğalcileri, halqara gumanitar uquqnı bozaraq, gumanitar marşrutlarnı bloklamağa ve ateşke tutmağa bitirmeyler. Bunıñ içün telükesizlik sebebine bugün gumanitar koridorlarnıñ açılmamasına qarar berildi». 

Memur inandırdı ki, gumanitar koridorlarnıñ eñ yaqın vaqıt içinde yañıdan işlemeleri içün akimiyet ğayret etecektir.