Mart ayınıñ 13-ünde ilk rus tankları Herson vilâyetindeki Vısokopillâ şeer şeklinde qasabasına kirdi. Bundan bir qaç kün evel cenkten qaçaraq Hersondan pek çoq aile keldi. İnsanlar, duşmannıñ Dnipropetrovsk vilâyetiniñ sıñırına kelemeycegine ümüt ete ediler.

Olarnıñ barışıqqa ve sakinlikke ümütleri, ilk “Gradlar”nıñ patlamalarınen yoq oldı. Ateşler bitkende qorqutulğan sakinler sığınaqlardan soqaqlarğa çıqıp bozulğan evlerni, binalarnıñ qalğan viraneliklerini, bozulğan cam ve direklerdeki kesilgen tellerni kördiler. Ayatta qalma uzun aftaları başladı: elektriksiz, gazsız ve içilir suvsız.

Mayıs ayınıñ 24-ünden itibarınen

HERSON VİLÂYETİ

Bu cenübiy bölgeniñ şeerleriniñ ve köyleriniñ taqdiri de beñzer. Stanislav köy territorial cemaatında (TC) tahminen yigirmi şahsiy ev viran etildi. Bir kün içinde anda qaazacılar, elektrik yolağlarını üç kere temir ete ediler.

Oleksandrivkada ateşler olmağan vaqıt ışıq ve suv bar. Bu köyde üç yüz şahsiy ve bir mektep qısmen viran etildi. Deyerli er kes ondan çıqtı, tahliyeden vazgeçken tek yüz elli kişi qaldı.

Borozen köy TC tibbiy teminatsız qaldı. On qasabanıñ sakinlerine hızmet etken feldşer noqtası viran etildi. Ayat telükesi sebebinden acele yardımniñ tibbiy işçileri tahliye ettiler.

Vısokopillâ cemaatında  elektrik, gaz ve suv teminatı tamamınen kesildi. Anda tüm memuriy binalar viran etildi. İnsanlar öz avto naqliyatınen telükeli zonadan ayırmağa tırışalar. Faqat tüm vilâyetinde yaqar mashulatı kemligi sebebinden er kes becermey. Yürmege qara bercen cesür kişiler de bar. Umunen şu anda 570ten ziyade meskün yer tamamınen yaqarsız qaldı.

Sakinleriniñ söylegenine köre, bir kimse yaqarnı tapsa da, rus işğalcileri meskün yerlerniñ sıñırını keçmege imkân bermeyler. Amma keçenlerde Vısokopillâdan, Arhanğelskten ve Knâzivkadan deyerli 2,5 biñ kişi öz evinden ayırıp Dnipropetrovsk vilâyetine ketti.

Novooleksandrivka TCnıñ sakinleri de evlerinden öz başına ayıralar. Anda da ışıq ve suv yoq. Tabiiy ve suniy suvlarnıñ olmağanı çöl köylerinde ayrıca zor ola. Olar arasında Petropavlivka, Çervone, Bilâyivka, Ukrayinka, Zolota Balka.

O yerge uzun zamandır ekmek ketirilmedi, insanlarnıñ un yedegi bitti. Tavrıçansk TCna aftada tek bir kere ekmek ketirilir.

Vaqtınca işğal etilgen Herson vilâyetiniñ sakinleriniñ daa bir ciddiy meselesi, ilâclarnıñ olmamasıdır. Hususan insulinge baplı olğan, onkologik hastalığı, şçitovidka hastalığı ve epileptik hastalığı olğan kişilerniñ büyük sayısını esapqa alaraq. Umunen 511 meskün yerniñ ilâclarğa ihtiyacı bar. Bu, cemaatlarnıñ deyerli 78%-idir. 130dan ziyade köyde azıq mahsuları kimligi, 89 köyde ise bala aşı kimligi mevcut ola.

Aynı zamanda işğalciler Hornostayivka, Konstântınivka, Rubanivsk, Askaniya-Nova ve Hrestivsk TClarınıñ meskün yerlerine daa sıq ketmege başladılar. Amma ilâclar ya da aş almaq içün degil. Olarnıñ maqsadı, vesiqalarnı teşkermek ve sakinlerge ruhiy tarzda basmaqtır.

Dercde, Herson vilâyet devlet memuriyetiniñ resmiy Facebook saifesinden alınğan malümat qullanıldı. Vilâyetiniñ toprağında arbiy areketler devam etkeni sebebinden vilâyetiniñ vaziyetini ögrenmek şu anda imkânsız qalır.