Vitse baş nazir İrına Vereşçuknıñ reberliginen Rus tecavuzı neticesinde Ukrainağa ketirilgen zararlarnıñ auditini yapma eyyetiniñ oturışı neticelerine köre, Cemaatlar ve topraqlar inkişafı nazirligi Ükümetniñ baqıluvına rusiyeniñ Ukrainağa qarşı silâlı tecavuzı neticesinde meskenler ve binalarnıñ bozulmalarını ve vianelerini qayd etüv yol-yoruğını bermeli.

Ukraina Nazirler Kabinetiniñ iyün ayınıñ 14-ündeki oturışı vaqtında bu qanun leyhası tasdıqlandı.

Bu yol-yoruq, Milliy yañıdan qurma şurasında işlegen Cenk neticesinde Ukrainağa ketirilgen zararlarnıñ auditini yapqan iş gruppası tarafından azırlandı.

Aşağıdaki qaideler teklif etilir:

• rusiye federatsiyasınıñ silâlı tecavuzı sebebinden tek şahsiy ve kommunal degil, em de devlet binalarınıñ ve evleriniñ bozmalarını qayd etmek;
• maqbul organlarnıñ qararlarına köre, eyyet ve ya tehnikiy teşkerüvi yaparaq bozulğan obyektlerni teşkemek;
• mesken fondnıñ, mesken-kommunal hocalıqnıñ ve cemiyet binalarınıñ obyektleriniñ bozmalarını ve zararlarını tesbit etkeni saalarnı muayyen yapmaq;
• eyyet teşkerüviniñ aktınıñ şekliy formasını ve mündericesini tesbit etmek.

Kelecekte eyyet teşkerüviniñ aktını Diia portalı vastasınen elektron şekilde yaratmağa imkân berecek hızmetniñ azırlanması planlaştırılır.

Temsilde bozulğan/viran etilgen mesken meselelerini çezüvge dair yol-yoruq aqqında tafsilâtlıca oquya bilirsiñiz.