İşğalden azat etilgen topraqlar meseleleri koordinatsiya ştabınıñ işi çeriçivesinde The HALO Trust adlı halqara minasızlşatıruv hayriye fondunen bir Memorandum imzalandı.

O, vitse baş nazir İrına Vereşçuknıñ, The HALO Trustnıñ reberi Mayri Kanninhemnen körüşüviniñ neticesi oldı.

Taraflar, işğalcilerden azat etilgne topraqlarda el ve maşna minasızlaştıruvları taqımlarınıñ çoqlaştırıluv planını muzakere ettiler ve eali içün ortaq maarif kampaniyalarını keçirmege añlaştılar. Bu cümleden, şimdi – mantar mevsiminde – ormanlarda ve ormanlarğa yaqın yerlerde patlayıcı şeylerniñ buluna bilmeleri aqqında malümat bermek.

Qayd etemiz ki, The HALO Trust – Britaniya qırallıq qorantası ve AQŞ devlet bölüginiñ yardımınen 30 sene dünyanıñ 28 ülkesinde minasızlaştırma saasında çalışqan halqara ükümetsiz teşkilâtıdır. Umumen 2014 senesinden Ukrainada The HALO Trust minasızlaştıra ve 2022 senesi avgust ayında ukrain topraqlarınıñ 4,2 million kvadrat metrini mina ve patlamağan bombalardan temizletti.

Hatırlatamız ki, sentâbr ayınıñ 10-unda Ükümet, Ukraina Prezidentiniñ İşğalden azat etilgen topraqlar meseleleri koordinatsiya ştabını teşkil etüv teşebbüsini destek etti. Ştabıñ esas vazifelerinden biri – tecavuzcılardan azat etilgen topraqlarnıñ minasızlaştırmaqtır.