Canlı yayında vitse baş nazir İrına Vereşçuk bunı qayd etti.

Onıñ sözlerine köre, Nazirler Kabineti Ukrainağa qaytuv kişilik vesiqasını tamam Ukrainanıñ topraqlarında vesiqalaştıruv ve berüvnen bağlı deñev leyhasını kirsetti.

Tecavuzcı bir devletke sürgün etilgen insannıñ kişilik vesiqası şu anda keçkende kibi tek konsullıq ve diplomatik müessiseleri degil, Devlet migratsiya hızmetiniñ organları da vesiqalaştıra bilirler.

“Ana-babası (ya da balası 18 yaşından kiçik olsa, başqa qanuniy temsilcisi), evlengen çift, 18 yaşından büyük, qanlı qardaş ya da Reintegratsiya nazirliginiñ hitabı esasında Ukrainada onı vesiqalaştırmaq mümkün. Devlet migratsiya hızmetiniñ organları yapılğan vesiqanı qanuniy temsilcisine ya da ailesiniñ azasına bereler ya da çet ülkede vesiqasız qalğan kişige yollaması içün Reintegratsiya nazirligine berecek”, – dep memur tafsilâtlıca añlattı.

Daa o qoştı ki, mezkür vesiqa 5 kün boyunca bedava olaraq yapıla. Vesiqanıñ süresi ise 3 ayğa qadardır.

Daa sualleriñiz olsa, Reintegratsiya nazirliginiñ sıcaq hattına hitap ete bilirsiñiz: çet ülkelerden ya da VİETdan WhatsApp/Telegram/Viber qullanımları vastasınen +38(096)078-84-33 telefon ete bilirsiñiz.

Hatırlatamız ki, oktâbr ayınıñ 18-inde Ükümet, Reintegratsiya nazirliginiñ teşebbüsini destek etip, qararınen Ukraina vatandaşlarınıñ vaqtınca işğal etilgen topraqlardan üçünci ülkeler vastasınen Ukrainağa qaytuv mesleleri koordinatsiya ştabını teşkil etti. Vitse baş nazir İrına Vereşçuk onıñ başı oldı.