Reintegratsiya nazirliginiñ teşebbüsinen halqara teşkilâtlar, işğalden azat etilgen Herson vilâyetiniñ sakinlerini gumanitar yardımnen, şu cümleden azıq mahsulatnen, içilir suv, ilâçlar, gigiyena eşyaları, qurucılıq malzemeleri ve generatorlarnen temin etecekler.

Ceryanğa UNHCR, UNICEF, IOM, WFP, Halqara Qırmızı Haç Eyyeti, Ukrainadaki Qırmızı Haç Teşkilâtı ve başqaları qatıldılar.

Şu anda 6 biñden ziyade sakin BMTnıñ müessiselerinden aşayt, suv, gigiyena eşyaları, qurucılıq malzemeleri, yataq çamaşırı ve küneş batareyalarında çalışqan fenerlerni endi aldı.

World Central Kitchen hersonlılarnı aşayt mahsulatınen endi temin ete.

Lehistan Ükümetiniñ bergeni işançlı gumanitar yük ve başqa halqara teşkilâtlardan yükler yaqın kelecekte vilâyetke ketirilecek.

“Hersonlılar, biz siz aqqında unutmaymız ve azat etilgen topraqlarda normal ayat yañıdan yaratmaq içün mümkün olğance ğayretimiz kösterecekmiz. Bizge bazı gumanitar yükler endi ketirildi, başqaları isr yaqın kelecekte ketirilecektir!” – dep Ukrainanıñ vaqtınca işğal etilgen topraqlarınıñ reintegratsiya meseleleri naziriniñ muavini Oleksiy Boroday qayd etti.

Hatırlatamız ki, Herson gumanitar ştabınıñ sıcaq hattı çalışa, ona (066) 637-49-85 nomera vastasınen telefon etmek ya da (098) 176-16-98 nomerağa Vİber, Telegram, Signal ve WhatsApp qullanımlarına beyanat yazmaq mümkün.