“İnter” telekanalınıñ canlı yayınında vitse baş nazir İrına Vereşçuk, devletniñ cenkten zarar körgen balalar aqqında nasıl qayğırğanını añlattı.

Memur, işniñ qurulışını böylece tasvir etti: Prezidentniñ Ofisi uzurında Andriy Yermaknıñ başlığınen Balalarnı qorçalav ve telükesizligi meseleleri idare şurası çalışa. Mezkür organnıñ eki prioriteti bar: sürgün etilgen balalarnı qaytarmaq ve qabaatlı insanlarnı mesüliyetke çekmektir. Prezidentniñ apayı Olena Zelenska, Umumiy ukrain ruhiy sağlıq programmasını patron ete. Mezkür programmanıñ esas yönelişlerinden biri – balalarnıñ ruhiy reabilitatsiya ve olarnı ruhiy-içtimaiy destek etmektir.

“Balalarnıñ ruhiy sağlığı – bizim kelecegimizdir. Balalarnı ruhiy destek etmek – devlet siyasetiniñ balalarğa dair prioritetlerinden biridir. Ükümet olaraq biz, Pzezidentniñ apayınıñ Ofisinen işdeşlik yapamız. Bizim balalarımıznıñ ruhiy reabilitatsiyasına yönelgen programmaları azırlaymız ve olarnı yerine ketiremiz”, – dep İrına Vereşçuk qayd etti.