AQŞnıñ halqara inkişaf agentligi (USAID) Kahovka GESnıñ patlamasından zarar körgen ev hocalıqlarına 22,5 mln grivnalıq yardım berecek. Ukrinform bu aqqında haber berdi.

Suvdan zarar körgen eñ az 1000 ev hocalığına para yardımı berilecek. Üç ay devamında er bir ev hocalığı, bir kişige 2200 grivna alacaq.

Bundan ğayrı, USAID esabat berdi ki, eñ az 14 biñ insannı içilir suvnen temin etti, Herson ve Mıkolayivde 7 biñ insanğa sıcaq aş berdi, suvda qurtarıcı operatsiyalarnı ve acele yardım üleştirmege destek etmek içün 10 biñ litre yaqarlıq berdi.

AQŞnıñ agentligi, tahliye içün avtobuslar ve qurtarıcı işlerni destek etmek içün gemizlerni temin eter. Hersonnıñ kritik asyapısı içün pompalarnı ketirüv planı üzerinde de çalışır.