Esirlikten qaytqan insanlar ve esirlikte alâ daa bulunğanlarnıñ ailelerine maliyeviy yardım ödemek içün devlet bücetiniñ yedek fondundan 140,3 million grivna ayırıldı. Oraq ayınıñ 11-inde Nazirler Kabinetiniñ oturışında maqbul qarar berildi.

Umumen siyasiy mabüsler, grajdan reineler ve esir etilgen askerlerniñ ailelerine senelik devlet para yardımını ödemek içün vesiqada 111,3 million grivna ögünden saylandı. Serbestlikten marum etilgen insanlarnıñ esirlikte bulunğanları er bir sene içün 100 biñ grivnalıq yardım ödenir.

Bundan ğayrı, esirlikten azat etilgen insanlarağa 100 biñ grivnalıq bir kerelik devlet para yardımını ödemek içün 29 million grivna üleştirilecek.

ReNazirligi, mezkür insanlarnıñ bank esaplarına para yollar.

ReNazirligi, esirlikten azat etilgen insanlar ve esirlikte bulunğan insanlarnıñ aileleriniñ içtimaiy qorçalanmasını temin etkenleri içün İqtisadiyat nazirli ve Maliye nazirligine teşekkür bildire.