Bugün Ükümet Binasında vitse baş nazir İrına Vereşçuknıñ başlığınen işğalden azat etilgen topraqlarda çalışmaları içün devlet organlarınıñ işçileri yedegini yaratmağa dair eyyetlerarası oturış keçirildi. Şu cümleden, tasil ve tibbiy saalarnıñ işçileri.

Tedbirde Devlet hızmeti meseleleri milliy agentliginiñ başı Nataliya Alüşına, Prezidentniñ Qırım MCdeki daimiy vekili Tamila Taşeva, Tasil ve ilim nazirligi, Sağlıq nazirligi ve başqa meraklanğan organlarnıñ vekilleri iştirak ettiler.

Oturışnıñ iştirakçileri qayd ettiler ki, oraq ayınıñ 3-ünden berli “İşğalden azat etilgen topraqlarda devlet hızmeti içün yedek” malümat-kommunikatsiya sisteması çalışmağa başladı. reserve.nads.gov.ua platformasında er kes anketa topldurıp, hadimler yedeginiñ parçası ola bilir.

Nataliya Alüşınanıñ bildirgenine köre, birinci aftada platformada deyerli 350 insan qayd etti ve bu sayı er vaqıt arta. Bugün ide eñ az üç yüz anket işlendi, yani bu insanlar yedekke endi kirsetildi.

Vatandaşlar öz başına bölge saylaya bilirler. Deyerli 80%-i Qırımnı saylaylar. Faqat başqa vilâyetlerni de qayd eteler: Zaporijjâ, Donetsk ve Luhansk.

Devlet akimiyetiniñ organlarınıñ yañından teşkil etilmesinden ğayrı, azat etilgen topraqlarda tibbiy yardım de müimdir. Şu anda Sağlıq nazirligi, anda çalışmağa azır olğan tibbiy işçiler elektron sicili üstünde çalışa.

Topraqlarımız işğalden azat etilecek soñ peyda olacaq çağıruvlar, tasil saasınen de bağlı olacaq. Birinciden laf, balalarnıñ millit tasil sistemasına qaytarılmaları ve işğal etilgen topraqlarda alınğan maqbul vesiqalarnıñ tanınması aqqındadır.

Bes-belli ki, Ukraina işğalcilerniñ diplomalarını asla tanımaycaqtır, dep İrına Vereşçuk qayd etti. Aynı zamanda memur Tasil ve ilim nazirligine işğalde tasil alamağa ve oqumağa mecbur qalğan insanlarnıñ ihtisasını tanıma algoritmini tüşünip çıqarmağa avake etti.

“İşğalden azat etilgen topraqlarımız içün hadimler yedeginiñ aktualliginiñ yañıdan qıymetlendirmek zordır. İlk künlerde yañıdan quruv yedegine qatılğan vatandaşlar, bütün ukrain topraqlarınıñ mıtlaqa olacaq işğalden azat etilmesine inanmasınıñ köstergicidir. Bu ceryanğa qatılğan Prezident Ofisi, Nazirler Kabineti ve parlamentke teşekkür bildirmege isteyim. Ukrainalıları yedekke qatılmağa, öz yönelişini saylamağa ve azat etilecek topraqlarğa ketmege azırlanmağa, devlet ve anda devletlikni yañıdan qurmağa çağıram”, – dep İrına Vereşçuk hulâsa çıqardı.