Vatandaşlarnı yaqarlıq odunınen temin etüvnen bağlı oturış vaqtında vitse baş nazir İrına Vereşçuk bunı bildirdi.

Anda Etraftaki müit ve tabiat resurslarını qorçalav naziri Ruslan Strilets, icra akimiyetiniñ merkeziy ve yerli organları, halqara teşkilâtlarnıñ vekilleri iştirak ettiler.

Muzakere mevzusı, cebege yaqın bölgelerniñ sakinlerini bedava yaqarlıq odunınen temin etüv oldı. Şu cümleden, ihtiyaclarını tesbit etüv aqqında laf ettiler.

Vitse baş nazirniñ sözlerine köre, bütün formal şeyler çezilmeliler: “Orman hocalıqları ve yaqarlıq odunı teminatçılarınen añlaşmalar, eñ acelen imzalanmalılar. Bundan ğayrı, bütün logistika meselelerini al etmek kerek”.

Arbiy areketler topraqlarınıñ sakinleri de bedava odunnen temin etilecektir. Maqbul 8 vilâyetiniñ, şu cümleden: Herson, Harkiv, Donetsk, Zaporijjâ, Dnipropetrovsk, Sumı, Çernihiv ve Luhansk vilâyetleriniñ sakinleri.

Bugün halqara teşkilâtlar, eñ az 18 biñ insannı qattı yaqarlıqnen temin ettiler.

Memur, mükemmel işi içün vilâyet arbiy memuriyetleri, Ukrzaliznıtsâ ve Devlet orman agentliginiñ vekillerine teşekkür bildirdi.

“Ava suvuq olmadan evel insanlarnı yaqarlıqnen temin etmek içün aşıqmalımız. Bizim idaremiz yardımınen insanlarğa bu qışnı oñaytlıca yaşamağa yardım etermiz”, – dep İrına Vereşçuk hulâsa çıqardı.