Cenk vaziyeti şaraitinde ealiniñ mecburiy tahliyesini keçirüv meseleleri idare ştabınıñ azaları, rey birliginen Herson VAMniñ qararını destek ettiler.

Herson vilâyetinde zor telükesizlik vaziyeti sebebinden 23 meskün yerden 802 balanıñ mecburiy tahliyesi tasdıqlandı. Herson, Berıslav ve Kahovka rayonlarından balalarnı tahliye etecekler.

Tahliye Hmelnıtsk, Mıkolayiv, Odesa, Lviv vilâyetine demiryol ve avtobus naqliyatınen bedava keçirilir.

Bundan ğayrı, tahminen 100 bala İvano-Frankivsk vilâyetindeki sanatoriylerden birinde yerleştirecek.

Daa telükesiz bölgelerde ana-babasından biri ya da qanuniy vekiliniñ ozğarmasınen tahliye etilecek balalar ödemeler, bedava mesken, gumanitar yardım, içtimaiy desteknen temin etilecek.

Herson vilâyetinden tahliye keçirmek içün üç tahliye toplanma noqtası ve beş tahliye alma noqtası açıldı.

Vitse baş nazir İrına Vereşçuk, balalarnıñ telükeli bölgelerden tahliye ceryanına ait olğan er keske teşekkür bildirdi. Bundan ğayrı, halqara teşkilâtlarnı Herson vilâyetine tahliye naqliyatınen (tahliye içün mahsus maşna-kapsullar) yardım etmege de çağırdı.

Hatırlatamız ki, Herson vilâyetinden tahliyenen bağlı sualleriñiz olsa, yerli akimiyet vekillerine hitap etiñiz. Sıcaq hatqa telefon etip, bunı yapmaq mümkün: 0 800 330 951. 

Bundan ğayrı ReNazirliginiñ sıcaq hattına – 15-48 telefon eterek ya da WhatsApp/Telegram/Viber – (096) 078-84-33 messengerlerine beyanat yazaraq, tahliye istegini bildirmek mümkün.