“İşğalden azat etilgen ve cebege yaqın topraqlarnıñ ealisiniñ yañıdan yaşamaları içün medeniyet ameliyatları ve ihtiyacları” içtimaiy araştırmasınıñ neticeleri bunı kösterdi. AQŞnıñ Halqara inkişaf agentliginiñ (USAID) “Cemaatnıñ işançınıñ pekitmesi” (UCBI) leyhasınıñ desteginen “Reyting” içtimaiy gruppası araştırma yaptı.

Umumen Çernihiv, Sumı, Harkiv, Dnipropetrovsk, Zaporijjâ, Odesa, Mıkolayiv ve Herson vilâyetleriniñ 18 yaşından büyük olğan 3200 sakinini soradılar.

Ögrenildi ki, işğal ve tolu miqyaslı tecavuz sebebinden, vatandaş özdeşligi meselesi kergin oldı.

Cevap bericilerniñ çoqusı özüni Ukraina vatandaşı tanıdı. Aynı zamanda özdeşliknen bağlı suallerge doğğan yer ceetinde degil, añlı saylav ceetinde de cevap bereler.

Özüni Ukraina vatandaşı tanıma cedveli (10 baa):

• Çernihiv vilâyeti – 9,3 baa;
• Sumı vilâyeti – 9,2;
• Harkiv vilâyeti – 9,0;
• Dnipropetrovks vilâyeti – 8,9;
• Zaporijjâ vilâyeti – 8,8;
• Odesa vilâyeti – 8,6;
• Mıkolayiv vilâyeti – 9,4;
• Herson vilâyeti – 9,1.

41 yaşından büyük respondentler, eñ vatanperverlidir. Cenk tecribesi olarnı deñiştirdi ve nazar noqtası daa ukrain taraflı oldı. Olar ukrain medeniyeti, yerli ve umumiy milliy tarihı, edebiyatı, urf-adetlerinen sıq meraqlanmağa başladılar.

Aynı zamanda respondentler, ukrain medeniyetiniñ birleştirici olğanını qayd ettiler. Olarnıñ fikrince, tamam Ukrainanıñ medeniy mirası, ealiniñ baş özdeşligini şekillendire ve işğalcilerge qarşılıq köstermege ruhiy şekilde azır olmağa yardım ete.