Bu, işğal etilgen Qırımda Ukrainanı destek etkenleri, öz devletine sadıq qalğanları sebebinden rusiye tarafından qanunsız tevqif etilgen insanlar, 2014 senesinden başlap Ukraina Mudafaa quvetlerinde silânen qarşılıq köstergen insanlar aqqında ikâyedir.
Qırımtatar Milliy Meclisiniñ ilk muavini, jurnalist, oca ve siyasetşınas Nariman Celâl ATR kanalında alıp barıcı, “Avdet” gazetasınıñ mühbiri olıp çalışa, Aqmescit halqara mektebinde tarih ve uquqşınaslıq derslerini alıp bere edi. 2013 senesi Qırımtatar Milliy Meclisiniñ ilk muavini oldı, bu organnıñ malümat-analitika bölüginiñ başı oldı.
Nariman Celâl er vaqıt faal cemaat erbabı edi, işğalci bir devlet tarafından qanunsız oolaraq tutulğan qırımtatar faalcilerini destek ete, tecavuzcılarnıñ cinayetlerini aydınlata, “Qırım birdemligi”niñ körüşüvlerinde iştirak ete, halqara meydançıqlarda Qırımnı azat etmek kerekligini bildire edi.
2021 senesi berim ayında işğal quvetçileri, çoq ev tinttiler ve 2021 senesi arman ayınıñ 23-ünde Qırım platforması İnauguratsiya sammitinde iştirak etken Nariman Celâlnı tuttılar. Bundan soñ Aqmescit rayonınıñ Biy Tanış köyünden belli olmağan bir yerge alıp kettiler.
Bundan soñ rusiye Nariman Celâlğa qarşı sahte dava açtı. Onı Anğaradaki gaz borularında diversiyada qabaatladılar.
2023 senesi orta küz ayında işğalciler Narimannı Qırımdan zoraki alıp, Aqmescitteki SİZOdan rus apishanesine etap ettiler. Eki ay soñ Nariman Celâlnıñ şu anda bulunğanı yer belli oldı – rusiyedeki Krasnoyarskiy kraynıñ Minusinsk şeerindeki apishane.
Kerçekten de yayınlanğan “deliller” arasında Qırım platformasınıñ sammitiniñ açılışına ve anda Nariman Celâlnıñ iştirak etkenine bağışlanğan vediqalar, Qırımtatar Milliy Meclisiniñ başı Refat Çubarovnen Facebookta onıñ mektüpleşüvi, olarnıñ rus quvetleri tarafından qırımtatarlarğa basım meselesini ve zoraki köçken qırımtatarlarnıñ qıtaviy Ukrianada içtimaiy-yaşayış meselelerini muzakere etüvleri bar.
Aynı zamanda işğal prokurorlığınıñ vekilleri, Nariman Celâlnıñ bu diversiya cinayetinde iştirakine dair iç bir delil bermedi.
Esirlikten bulunğanda siyasiy mabüs ukrain halqına çoq mektüp yazıp, Ukrainanıñ ğalebesine ümüt ete.
Tevqif, azaplar ve basımğa baqmadan işğalciler Nariman Celâlnıñ qarşılığını toqtatamadılar ve onıñ Ukrainağa sadıqlığını bozamadılar.
Qarşılıq devam ete!