![](https://minre.gov.ua/wp-content/uploads/2024/07/photo_2024-07-07_12-09-41.jpg)
Ukraina Silâlı quvetleriniñ baş komandanı Oleksandr Sırskıy, askerlerniñ halqara gumanitar uquqnıñ (HGU) qaideleriniñ ögrenüvini prioritet olaraq qabul etti. Ukraina Silâlı Quvetleriniñ Baş ştabınıñ matbuat hızmeti bunı bildirdi.
“Rusiye Federatsiyasınıñ Ukrainağa qarşı devam etken silâlı istilâsı ve devletimizniñ qabul etkeni halqara mecburiyetlerini yerine ketirmek içün Ukraina Silâlı Quvetleriniñ Baş komandanı, askerler içün azırlıq kursına halqara gumanitar uquq (silâlı çatışmalar uquqı) qaidelerini ögrenmek mecburiy bloknı kirsetmege qarar aldı”, — dep bildirildi.
Baş ştab qoştı ki, bu qarar uquq medeniyetiniñ yüksek seviyesiniñ teminatı ve askerlerniñ azırlanuvına dair kompleksli yanaşuvnıñ bir parçasdır. Çünki Ukraina Silâlı Quvetleriniñ reberligi arbiy faaliyetniñ bütün saalarında halqara gumanitar uquq qaidelerine riayet etüvge ayrı diqqat ayıra.
Qayd etmek kerek ki, keçenlerde keçirilgen halqara gumanitar uquq idarelerarası eyyetniñ oturışında, vitse baş nazir İrına Vereşçuknıñ yolbaşçılığında, HGU tasil müessiseleriniñ oquv programmalarına, devlet hızmetçileri ve askerleriniñ azırlıq programmalarına kirsetmek qararı alındı. Eyyetke USQniñ Baş ştabı ve Mudafaa nazirliginiñ vekilleri de kirdiler.