Olarnı, vitse baş nazir İrına Vereşçuknıñ yolbaşçılığınen, DAK içün mesken meseleleri oturışında muzakere ettiler.

 

Şu cümleden, Ukrainanıñ şarqında DAKlerniñ mesken şaraitini yahşılaştıruv leyhası aqqında söz yürsetildi. O, Qurucılıq içün kredit müessisesi (KfW) ve Halqara migratsiya teşkilâtı (HMT) tarafından yerine ketirile. Leyhanıñ çerçivesinde 43 obyektniñ qurucılığı/tamiri ve umumen 2 biñ daire közde tutula.

 

Anda aman-aman 6 biñ köçip kelgen ve hassas kategoriyalı vatandaşlarnı yerleştirmege planlaştırıla. Bu plan Vinnıtsâ, İvano-Frankivsk, Kıyiv, Lviv ve Çernivtsi vilâyetlerinde yerine ketirile.

 

Daa bir teşebbüsni ğayrıdan quruv kredit müessisesi (KfW) ve Ukraina içtimaiy yatırım fondu (UİYF) beraberlikte yerine ketireler. O, Dnipropetrovsk, Lviv, Harkiv ve Hmelnıtskıy vilâyetlerinde 625 DAK içün 220 daire azırlamağa niyetlene.

 

ReNazirliginiñ Devlet yaşlar hızmetinen yapqanı üçünci leyha, grant parasına DAKniñ ipoteka kreditidir. Onı Almaniya ükümeti ğayrıdan quruv kredit müessisesi (KfW) vastasınen bere. Programmağa köre, köçip kelgenlerniñ qorantaları Ukrainada eñ alçaq faiznen, yani 3%-ge qadar, ev ala bileler.

 

Kreditler 30 senege berile ve ev fiyatınıñ 6%-ini töleyler. Programma çerçivesinde 2,5 biñden çoq DAK içün 1094 daire bermege planlaştırıla. Leyhanıñ coğrafiyası — Ukraina ükümetiniñ nezaretindeki bütün topraq.

 

İşbu teşebbüslerniñ neticelerine köre, 9 biñden çoq DAK içün aman-aman 3,3 biñ daire temin etilecek. Umumen bu leyhalar içün tahminen 140 million yevro ayırıldı.

 

“Halqara tehnikiy yardım leyhaları çerçivesinde, ReNazirligi, DAKlerge ev teminatına doğrultılğan bir qaç mesken leyhasını yerine ketire. Olar kerçekten de semereli ve faydalı. Bütün nazirliklerni telükeli yerlerden çıqmağa mecbur olğanlarnı meskennen temin etmek içün imkânlarnı qıdırmağa çağıram”, – dep İrına Vereşçuk qayd etti.