Keçenlerde paytahtta olıp keçken Atlas United 2024 festivalinde “Serbest Qırımğa mektüpler” aktsiyasınıñ levhası çalışa edi. Ukraina Prezidentiniñ Qırım Muhtar Cumhuriyetindeki Temsilciligi bu aqqında haber berdi.

Bundan ğayrı, Odesa halqara film festivali, mezkür teşebbüske qol tuttı. Anda bazı rejissörlar, aktörlar ve film saasınıñ başqa vekilleri, siyasiy mabüslerge mektüpler aktsiyasına qoşuldılar.

Bu aktsiyanıñ maqsadı – cemiyetke vaqtınca işğal etilgen Qırım yarımadasında ukrain tarafdarı olğanı sebebinden qanunsız olaraq apiske alınğan vatandaşlar aqqında hatırlatmaqtır.

Hatırlatamız ki, 2024 senesiniñ soñuna qadar Ukrainada ve çetel ülkelerinde “Serbest Qırımğa mektüpler” kampaniyası devam etecek. Bağlantığa basıp, mektüp yazuv qaidelerini ögrenmek mümkün.

Mektüplerni aşağıdaki adreslerge yollamaq mümkün:

• İnsan aqları aqqında malümat merkeziniñ adresine (yollanğan insan ödey) a/s V-539, Kıyiv ş., 01001;
• [email protected] elektron poçtasına yollamaq içün.

Teşebbüsniñ teşkilâtçıları – ReNazirligi, Ukraina Prezidentiniñ Qırım Muhtar Cumhuriyetindeki Temsilciligi, Ukrain PEN, ZMINA İnsan aqları merkezi.