Soravda iştirak etken ukrain sığınaqçılarınıñ ekseriyeti (64%) vaqtınca bulunğan memleketlerinde yaşamağa alışmadı ve Ukrainağa qaytmağa azır.

Bunı Gradus Research şirketiniñ içtimaiy tedqiqatı isbatlay.

Tedqiqatqa köre, Ukrainağa qaytmaq niyetine eñ çoq adaptatsiya faktorı tesir ete (55%).

Evge qaytmaq istegi aqqında Ukraina şirketlerinde uzaqtan çalışqan (70%) ya da vaqtınca işsiz qalğan (68%) sığınaqçılardan çoqusı bildirdi.

Aynı zamanda soralğanlarnıñ çoqusı (62%) Ukrainağa qaytacaq vaqtını aytmağa daa tereddüt ete.

Amma, cevap bergenler, evge qaytmaq qararını daa tez qabul etmege yardım etecek faktorlarnı qayd ettiler.

Soralğanlarnıñ 41%-i işke kirüvniñ kefaletligini buña qoştı.

36% respondent içün Ukrainağa qaytuv vaqtında maddiy yardımnıñ olması müimdir, 33% içün ise Ukrainanıñ telükesiz bölgesinde mesken almaq ya da qurmaq imkânı müimdir.

Soravdan keçkenlerniñ daa dörtte biri (27%) Ukrainağa avadan mudafaa quvetleştirilse, qaytmağa azır.