Ukraina vitse baş naziri İrına Vereşçuknıñ yolbaşçılığında çetelde yaşağan ukrainlernen bağlı mahsus oturışta söz yürsetildi.

 

Ukrain institutı — 2018 senesi qurulğan Tış işleri nazirliginiñ yanındaki devlet müessisesidir. İnstitutnıñ vazifesi, medeniy diplomatiya vastalarınen halqara meydanda Ukrainanıñ mevamını pekitmektir.

 

Beş senelik faaliyeti devamında institut dünyanıñ 87 memleketinde 430 medeniy leyhanı ömürge keçirdi. Müessiseniñ Berlin ve Pariste temsilcilikleri bar.

 

İnstitutnıñ strategik maqsatlarından biri dünyada ukrain tiliniñ qullanuv meydanını keñleştirmektir. Şimdilik bu yönelişte bir qaç leyha endi ömürge keçirilgen:

 

• İnstitutnıñ saytında “Ukrain tili” saifesi (mobil qullanmalar, online platformalar, podkastlar, oquv kursları, ukrain tilini çetel tili olaraq ögrenmek içün derslikler ve luğatlar);
• dünyadaki ukrain ve qırımtatar studiyalarınıñ tedqiqi (merkez haritası, faaliyet formatları, ukrain tili kursları);
• Lehistan ve Avstriyanıñ 7 müzeyinde ukrain tilinde sesli gidler;
• Padua universitetinde (İtaliya) ukrain tili ve edebiyatı kursları;
• ukrain tiliniñ sanat leyhalarında teşviqatı.

 

Bundan ğayrı, şimdi tışqı memleketlerde İnstitut temsilcilikleri esasında ukrain tili çetel tili olaraq kurslarınıñ teşkil etilmesine azırlıq yapıla.

 

Vitse baş nazir İnstitutnıñ Lehistandaki bölügini açmaq kerek olğanını qayd etti, çünki anda ukrainlerniñ çoqusı muvaqqat qoruvnı qıdıra. Böyle muzakereler Lehistannen endi alıp barıla.

 

“Ukraina institutınıñ faaliyetini quvetleştirmek kerekmiz. Bu, vatandaşlarımızğa çetelde milliy ve devlet menligini saqlamaq içün yañı imkânlar yaratacaq”, — dep İrına Vereşçuk hulâsa çıqardı.