Tedbir Kıyiv şeerinde keçirildi. Onıñ çerçivesinde panel munaqaşası olıp keçti, iştirakçiler cenk vaqtında Ukrainada gumanitar faaliyetniñ meydanğa ketirilmesi ve muvafaqiyetlerini muzakere ettiler.

 

Bundan da ğayrı, tedbirde Ukrainada gumanitar işlerni köstergen fotoresimler sergisi taqdim etildi.

 

Tedbirge Ukrainadaki BMTnıñ sisteması idarecisi, Gumanitar idareci Mattias Şmale, Humanitarian NGO Platform in Ukraineniñ müdiri Yoanna Ğarbalinska, Ukraina grajdan cemiyeti teşkilâtlarınıñ ittifaqınıñ reisi Mila Leonova ve İdare gumanitar merkeziniñ reisi Yevhen Kolâda qoşuldılar.

 

İrına Vereşçuk cenk şaraitinde gumanitar qarşılıqnıñ müimligini qayd etti. O, telükege baqmadan işini devam etken eali ve gumanitar hadimlerniñ qoruvını quvetleştirmek kerekligini de qayd etti.

 

“Ukrainada çalışqan gumanitar teşkilâtlar yüksek seviyede ihtisaslılıq köstereler. Olar pek motivatsiyalı, vaziyetke tez cevap berip, qarar alalar“, — dep vitse baş nazir qayd etti.

 

Aynı zamanda o qayd etti ki, tınç yaşağan ealige destek köstermege devam etmek pek müimdir.

 

“Kelecek qış qıyın olacaq. Biz buña azır olmalımız. Amma omuzlarımıznıñ artında tecribemiz bar. İnsanlarnıñ bizden ne qadar çoq destek beklegenini de bilemiz. Onıñ içün beraberlikte olarğa yardım ete bilemiz”, — dep İrına Vereşçuk qoştı.