Arman ayınıñ 20. künü Ukraina Prezidenti Volodımır Zelenskıynıñ başlığınen tedbir olıp keçti.

 

Anda Prezidentniñ Ofisiniñ reberi Andriy Yermak, baş nazir Denıs Şmığal, birinci vitse baş nazir Yuliya Svırıdenko, vitse baş nazir İrına Vereşçuk ve Ükümetniñ başqa vekilleri iştirak ettiler.

 

İştirakçiler topraq cemiyetleriniñ qızdıruv mevsimine azırlığını muzakere ettiler. Aynı zamanda mesken-kommunal hocalıq müessiseleriniñ işançlı çalışmasınıñ teminatını muzakere etildi.

 

Alternativ energiya leyhalarına diqqat ayırıldı. Bu işlerniñ maqsadı cemiyetlerniñ energetik mustaqilligini arttırmaq ve ananeviy energiya resurslarınıñ qullanuv payını eksiltmek ve ilâhre.

 

Oturış çerçivesinde, qabul etken cemiyetlerde DAKlerge qol tutuv tedbirleri de muzakere etildi. Şu cümleden, köçip kelgenlerniñ mesken ve iş meseleleri.

 

“Biz köçip kelgenlerniñ qabul etken cemiyetlerge tolusınen qoşulmaları içün çalışamız. Bizim içün insanlarnıñ özlerini telükesiz ve öz kelecegine işançlı is etmeleri, yañı şaraitte ayatlarını ğayrıdan tiklemege imkânları olması müimdir”, — dep vitse baş nazir qayd etti.

 

Bundan da ğayrı, memur, DAK içün mesken obyektleriniñ qullanılması içün cemiyetlerde devlet ve kommunal mülkniñ inventarizatsiyasınıñ müimligini qayd etti.

 

“Şimdi devlet içinde köçip kelgenlerniñ yaşağan yerlerini cedvelge almağa tırışamız. Bu esnasqa devlet akimiyeti ve yerli idare organları celp etile. Bu seneniñ soñuna qadar böyle evlerniñ fondunı qurmağa planlaştıramız. Bu, cemiyetlerge devlet içinde köçken şahıslarnı vaqtınca meskennen tez temin etmege imkân berecek”, — dep İrına Vereşçuk qayd etti.