Tedbirde Ukraina prezidenti Volodımır Zelenskıy iştirak etti. Forumnıñ iştirakçileri arasında – Yuqarı Şuranıñ reisi Ruslan Stefançuk, baş nazir Denis Şmığal, vitse baş nazir İrına Vereşçuk, nazirlik ve müessiselerniñ reberleri, veteran ve cemaat teşkilâtlarınıñ vekilleri, diplomatlar ve başqaları.

 

Forum, veteranlar siyaseti meselelerini muzakere etmek ve veteranlar, olarnıñ qorantaları ve elâk olğan askerlerniñ qoranta azalarına qoltutmaq içün umumiy qararlar çıqarmaq içün platforma olaraq hızmet ete.

 

İrına Vereşçuk “Cenk veteranları içün devlet” adlı munaqaşada iştirak etti. O, toplaşqanlarğa muracaat etip, Ukraina topraqlarını qorçalağan ve vatandaşlarımıznı qorçalağan askerlerimizge teşekkür bildirdi.

 

Onıñ aytqanına köre, veteranlarımıznı diñlemek ve olarğa qulaq asmaq müimdir. Olar devletniñ cenkten soñ ğayrıdan tiklenüvinde, devlet akimiyet organlarında ve yerli öz-özüni idare etüvde, biznes inkişafında ve ilâhre iş adamlarınıñ yedegi teşkil etilmesinde imkânlarıdır.

 

Devletniñ veteranlar siyaseti cemaatlardan başlap şekillendirilmeli. Olarnıñ iş tecribesi ve eñ yahşı ameliyatları bütün Ukrainağa tarqatılmalı.

 

“Bu sebepten iştirakçilerni obyektiv olmağa, açıq ve añlayışlı teklifler bermege çağıram. Kelecekte olar, içtimaiy yaşayışına reintegratsiya yolunda veteranlarğa yardım etecek qanun deñişmeleriniñ temeli olsun”, — dep vitse baş nazir qayd etti.

 

Forumda iştirakçiler tecribelerinen paylaşalar, meselelerni ve çezüv yollarını muzakere eteler, yañı teşebbüs ve leyhalarnı taqdim eteler.

 

Bundan da ğayrı, veteranlarnıñ ikâyelerinen bağlı sergilerni, destek mütehassıslarınıñ, ameliy ruhiyatçılar, adliyeciler, ihtisasiy adaptatsiya mesleatçılarınıñ taqdimlerini baqıp çıqmaq mümkün. Bundan da ğayrı, muvafaqiyetli bölge leyhaları, veteranlarnıñ iş mahsulatı ve veteranlarnıñ sanat eserlerinen tanış olmaq mümkün.