Ukraina Mustaqillik kününe bağışlanğan tedbirler aqqında Ukraina Prezidentiniñ Ofisi haber etti.

 

Prezident Volodımır Zelenskıy ve birinci hanım Olena Zelenska elâk olğan ukrain qaramanlarınıñ hatırasını añdılar. Olar elâk olğan askerlerniñ hatıra aleyasından keçip, Hatıra divarına çiçekler qoydılar.

 

Soñ Sofiya katedral kilsesinde Ukraina içün dua oldı. Kilse ve diniy teşkilâtlarnıñ vekilleri devletimiz ve onı qorçalağan askerler içün umumiy dua oqudılar.

 

Bundan da ğayrı, Sofiya meydanında Mustaqillik kününe bağışlanğan tantanalı tedbirler keçirildi. Tedbirge vitse baş nazir İrına Vereşçuk qoşuldı.

 

Ukraina ve ukrain halqını bayramnen hayırlamağa Poloniya prezidenti Andjey Duda ve Litvaniya baş naziri Ingrida Şımonite keldiler.

 

“Ukraina daima mustaqilligini saqlaycaq, ve bu iç bir vaqıt sual altında olmaycaq. Biz epimiz beraber cevap berdik — ve bu tarihiy cevap — birlik, cesaret ve beraber çalışqanımız sayesinde. Cevap: ya Ukraina olmaq, ya da ukrain olmaq. Çetel istilâsı bizge, milletimizge böyle bir sualni qoyğanda, er şey millionlarnen insandan bağlı, er biri öz areketleri ile bütün halqnıñ taqdirini belgiley, ve bütün halq öz umumiy küçü ile er kesniñ taqdirini belgiley”, – dep qayd etti Volodımır Zelenskıy.

 

İştirakçiler devletimiz içün canlarını feda etken bütün ukrainlerniñ hatırasına sükünet daqqası berdi.

 

Prezident Ukraina mustaqilligini ne paalığa qorçalağanını hatırlamağa çağırdı.