Vitse baş nazir İrına Vereşçuk Qırımda devlet akimiyetini ğayrıdan tiklev qanun leyhasını taqdim etti. Taqdim etüv Yuqarı Şuranıñ mudafaa eyyetiniñ oturuşında olıp keçti.

 

“Cenk vaziyetiniñ uquqiy rejimi aqqında” Ukraina qanunına Qırım Muhtar Cumhuriyeti ve Aqyar şeerinde devlet akimiyetiniñ ğayrıdan tiklenilmesiniñ hususiyetlerine dair deñişmeler kirsetilüvi aqqında” qanun leyhası aqqında söz yürsetile.

 

Bu qanun leyhası yarımadada devlet akimiyetini ğayrıdan tiklemek içün şartlar yaratmaq ve onıñ Ukraina devlet idare etüv sistemasına qoşulmasına yardım etmek maqsadınen yapıldı. Yerli idare islâatını da temin etmek kerek. Hususan, yañı rayonlarnıñ, topraq cemiyetleri ve idare organlarını teşkil etmek içün yapıldı.

 

Bundan da ğayrı, arbiy vaziyet vaqtında qanun leyhası Qırım Muhtar Cumhuriyetiniñ Arbiy memuriyetini meydanğa ketirmege teklif ete. Bu organ Nazirler Şurası ve Qırım MC Yuqarı Şurasınıñ vekâletlerini eda etecek, aşağı seviyedeki arbiy memuriyetlerniñ faaliyetini idare ve nezaret etecek, bir sıra başqa vekâletlerni eda etecek.

 

Qanun leyhasınen yerli öz-özüni idare etüv organları, olarnıñ memurları ve Qırım MC VİETdan köçürilmegen devlet organlarınıñ devlet hızmetçileriniñ vekâletleri toqtatılacaq künü (2014 senesi kiçi aynıñ 27-den itibaren) belgilene.

 

İşbu qanun leyhası ReNazirligi tarafından Prezident ofisi, Prezidentniñ Qırım MC Temsilciligi, Astyapı nazirligi ve Devlet hızmeti meseleleri milliy agentliginiñ vekillerinen birlikte azırlandı. Bu sene saban ayında leyha Nazirler Kabineti tarafından tasdıqlandı.

 

“Bu qanun leyhasına qoltutqan parlamentniñ milliy havfsızlıq, mudafaa ve istihbarat eyyeti ve zenaatdaşlarıma minnetdarım. Bu leyha — Qırımda ukrain akimiyetiniñ ğayrıdan tiklenüvi aqqında. O, ukrain keçmişte olğan, şimdi olğan ve kelecekte olacaq Qırım aqqında”, — dep qayd etti vitse baş nazir.