Bugün esirlerniñ daa bir deñişmesi keçirildi. Esirlikten 26 erkek ve 23 qadın qaytarıldı.

 

Şu cümleden, Ukraina Silâlı Quvetleriniñ 8 vekili (eki topraq mudafaacısı),  Arbiy-deñiz quvetleriniñ 13 askeri ve Milliy polisniñ eki hadimi, dört sıñırcı, Milliy gravdiyadan 15 Mariupol ve Azovstal qorçalayıcısı muvafaqiyetnen azat etildi. Başqa yedisi – tınç yaşağan vatandaşlar.

 

Şu cümleden, Gürcistan sıñırını keçkende ruslar tarafından tutulğan qırımtatar faalcisi Leniye Umerova azat etildi.

 

Bundan ğayrı, Mariupoldaki arbiy hastahaneniñ başı olğan Ukraina Qaramanı, tibbiy hızmet polkovnigi Viktor İvçuk evge qayttı.

 

Ukraina Prezidenti Volodımır Zelenskıynıñ emrinen Prezident Ofisi, Ukraina Mudafaa Nazirliginiñ İstihbarat Baş İdaresi ve Ukraina Telükesizlik Hızmeti, İİN, Reintegratsiya nazirligi ve başqa müessielerniñ yardımınen deñişme keçirildi.

 

ReNazirligi uzurında Milliy malümat bürosı (MMB), esirlikten azat etilgen insanlarnı adetince ilk kerekli eşyalarnen arqa çantaları, aş, urba, ayaqqabı, gigyena eşyaları ve cep telfonınen temin etti.

 

Bundan ğayrı, MMB esirlikten azat etilgen insanlarğa vesiqalar, bank esapları ve sim-kartlarnı yañıdan almağa yardım ete. Ve olarnıñ devletten 100 biñ grivnalıq bir kerelik para yardımını almaları içün ozğaruv temin ete.

 

Rusiye esirliginden azat etilgenlerniñ episi tibbiy teşkerüvden keçecek, bedeniy ve ruhiy reabilitatsiyağa yardım alacaq.

 

Ukraina Birleşken Arap Emirliklerine deñişimni teşkil etmege yardım etkeni içün minnetdarlığını bildire.

 

Bugünki askerlernen deñişme – rusiyeniñ tolu miqyaslı tecavuzından soñ 56-ncıdır. Böylece umumen işğalcilerniñ esirliginden endi 3569 Ukraina qorçalayıcısı azat etildi.