REDpreneur global franşizası tarafından Avstriya Qızıl Haçınıñ desteginen başlatılğan REDpreneurUA programması aqqında aytamız.

Bunı Ukraina Qızıl Haç teşkilâtı bildirdi.

Programmada biznesniñ bütün saalarında bedava tasil berile. Oña öz biznesini açmağa planlaştırğan şahıslar da, yañı yönelişlerni ögrenmege istegen iş adamları da qoşula bileler.

Leyhağa 18-59 yaşında ve eali kategoriyalarından birine ait olğan insanlar qoşula bileler:

– devlet içinde köçken şahıslar;

– saqatlar;

– veteranlar;

– qıyın yaşayışta olğan qadınlar;

– vasiyler, çoq balalı ana-babalar, yalıñız ana-babalar;

– işsizler.

Saylavda yañı biznesni qurmağa ve iş imkânlarını yaratmağa istegen iştirakçilerge, em de Ukrainanıñ ğayrıdan tiklenüvi ve inkişafına doğrultılğan start-up ya da içtimaiy biznesni açmağa planlaştırğan iş adamlarına üstünlik berilecek.

Programmada iştirak etmege istegenler Ukraina topraqlarında yaşap, tasil almaları içün stabil internet kirişine saip olmalılar.

Programmada iştirak etmek içün 2024 senesi orta küz ayınıñ 20-ne qadar muracaat etmek mümkün.