Ukraina Prezidentiniñ Ofisiniñ yolbaşçısı Andriy Yermak Kanada tış işleri naziri Melanie Joly ve Frenkistan tış işleri naziri Jan-Noel Barroğa Rusiye Federatsiyası tarafından hırsızlanğan ukrain balalarınıñ qaytarıluvı boyunca ortaq beyanat ve destek içün teşekkürler bildirdi. O Telegram kanalında bu aqqında yazdı.

Frenkistan ve Kanada Tış işleri nazirlikleri Rusiyege ukrain balalarını qorantaları, vasiyleri ve cemiyetlerine qaytarmağa çağırdılar.

Diplomatik bölüklerniñ umumiy beyanatında qayd etildi ki, kelecekte keçirilecek nazirler konferentsiyasında olar, Rusiye istilâsınıñ qurbanı olğan ukrain balalarını evge qaytarmaq içün muayyen tedbirler planını azırlaycaqlar.

Bundan ğayrı, taraflar ukrain balalarını qaytarmaq maqsadınen yapılacaq ıntıluv ve aralaştıruvğa qol tutmağa ve faal destek köstermege vade ettiler.