Cenkten evel Olena Sobko şimdiki vaqıtta işğal etilgen Enerğodarda yaşay edi ve Zaporijjâ atom elektrik stantsiyasında çalışa edi.

Şeerniñ işğali sebebinden Çerkası vilâyetiniñ Kanev şeerine köçmege mecbur oldı. Bu yerde o, çoqtan sevgen işini ömürge keçirmege – tabiiy kosmetika işinen oğraşmağa qarar berdi.

Öz biznesini açmaq içün maddiy destek qıdıruvdan başladı. Olena iş planını azırladı ve onı köçip kelgenler içün grant yarışına kirsetti. Soñra “MHP — Cemaatqa” hayriye fondundan maddiy yardım aldı.

Berilgen paralar kerek olğan donatmalarnı satın almağa, biznesni resmiy olaraq qayd etmege ve istisalnı başlamağa imkân berdi. Tabiiy kosmetika qısqa müddette müşteriler arasında talap etilip başladı.

İstisalde qadın tek tabiiy malzemelerni qullana, bir qısmını ise öz elinen yapa. Şimdiki vaqıtta onıñ mahsulatında tahminen 80 çeşit kosmetika bar.

Olena istisalnı kenişletmege planlaştıra ve kosmetikası içün qullanılacaq ösümliklerni östüre bilecek topraqlı öz evini satın almağa arzu ete.