Bring Kids Back UA halqara ihtisasiy gruppası tarafından “Sürgünlik ve mecburiy köçürüvden zarar körgen balalarnıñ reintegratsiyası: halqara standartlar ve Ukraina içün eñ yahşı ameliyatlar” adlı beyaz kitap taqdim etildi. Tedbir Prezident Ofisinde olıp keçti. POniñ saytında bu aqqında haber berildi.

Taqdim merasiminde Prezident ofisiniñ yolbaşçısı Andriy Yermak, Prezident ofisiniñ yolbaşçısınıñ mesleatçısı, Bring Kids Back UA operativ müdiri Darya Zarivna, Baş prokuror Andriy Kostin, Prezident ofisiniñ yolbaşçısınıñ muavini İrına Vereşçuk ve Ukraina prezidentiniñ bala aqları ve bala reabilitatsiyası vekâletlisi Darya Ğerasımçuk iştirak ettiler.

Bundan da ğayrı, tedbirge Bring Kids Back UA halqara ihtisasiy gruppasınıñ reisi, Halqara uquqçılar birleşmesiniñ İnsan aqları institutınıñ (IBAHRI) müdiri Helena Kennedi, Keçici adliye baş mesleatçısı Şaranjit Parmar ve “Küçlü Ukraina içün ortaqlıq” Fondunıñ keçici adliye ve ükümet munasebetleri baş mütehassısı Entoni Triolo qoşuldılar.

Taqdim etilgen vesiqa, ukrain balalarınıñ evge qaytması esnasına diqqat ayırılğan birinci Beyaz kitapnıñ devamıdır.

Ekinci Beyaz kitapta Ukrainağa qaytqan ukrain balalarına kimliklerini ğayrıdan tiklemege ve cemiyetke qoşulmasına yardım etmek içün ameliy tevsiyeler berile. Em de bu balalarğa ruhiy-içtimaiy destek köstermek kerek olğanını qayd ete.

Mezkür vesiqa, devlet müessiseleri, vatandaş cemiyeti ve halqara ortaqlar arasında olarnıñ ihtiyaclarını temin etmek içün idare ğayretleriniñ kerekligini qayd ete.

Bağlantı vastasınen Ekinci Beyaz kitapnen tanış olmaq mümkün.