Harkiv vilâyetiniñ mudafaa şurasınıñ oturışında Kupyansk ve İzüm rayonlarınıñ bazı meskün yerlerinden tahliye aqqında qarar qabul etildi. Harkiv VAM bu aqqında haber berdi.

Qayd etilgenine köre, Kupyansk rayonında, şu cümleden Kupyansk şeerinde de, vatandaş ealisini tahliye etüv tedbirleri sertleştirile. Berim ayınıñ 9-ndan orta küz ayınıñ 14-ne qadar rayondan 234 bala ve qorantası tahliye etildi, daa 35 bala tahliye etmek kerek.

Bundan ğayrı, İzüm rayonınıñ Borova topraq cemiyetinde balalı qorantalarnıñ mecburiy şekilde tahliyesi ilân etildi. Borova köyünden 119 bala tahliye etildi.

Hatırlatamız ki, tahliye bedavadır. ​​Telükesiz bölgelerge tahliye aqqında mesleat almaq içün Harkiv VAMniñ tahliye meseleleri sıcaq hattına telefon etmek kerek: 0 800 339 291.

Tahliye olunmağa istegiñiz aqqında 24 saat devamında çalışqan ReNazirliginiñ 15-48 sıcaq hattına da bildirmek mümkün. WhatsApp/Telegram/Viber messengerleri vastasınen haberler etmek içün: (096) 078-84-33 nomerası bar.